काठमाडौं  – होटल संघ नेपालका अध्यक्ष विनायक शाहले नेपाल भ्रमणको लागि सुरक्षित रहेको सन्देश तत्काल विश्वभर फैलाउन आवश्यक रहेको बताउनुभएको छ ।

भोटेकोसी बाढीले नेपालको पर्यटकीय क्षेत्रमा नकारात्मक असर व्यहोनुपरेकोले त्यसको पुनरुत्थानका लागि तत्काल प्रवर्धन अभियान सञ्चालन गर्नुपर्ने उहाँले बताउनुभएको हो । न्युज एजेन्सी नेपालसँगको कुराकानीमा उहाँले नेपाल भ्रमणको लागि सुरक्षित रहेको सन्देश विश्वभर फैलाउन आवश्यक रहेको उल्लेख गर्नुभयो ।

नेपालको पर्यटन क्षेत्रको पुनरुत्थानका लागि भारत र चीन लगायतका प्रमुख पर्यटकीय बजारमा तत्काल प्रवर्धन अभियान सञ्चालन गर्नुपर्नेमा जो दिनुभयो । भोटेकोसी कोरिडोरमा आएको विपत्तिले अन्तर्राष्ट्रिय स्तरमा नेपालबारे नकारात्मक सन्देश जान सक्ने भएकोले त्यसलाई चिर्न आवश्यक रहेको उहाँको भनाई छ । उहाँले विपद् प्रभावित क्षेत्र र सामान्य अवस्थामा रहेका पर्यटकीय गन्तव्यबिचको भिन्नता स्पष्ट पार्न आवश्यक रहेको बताउनु भयो ।

अध्यक्ष साहले काठमाडौँ, चितवन र पोखरालगायतका प्रमुख पर्यटकीय गन्तव्य सामान्य अवस्थामा रहेको सन्देश अन्तर्राष्ट्रिय बजारमा पु¥याउन सरकार, नेपाल पर्यटन बोर्ड, विदेशस्थित नेपाली दूतावास र निजी क्षेत्रले संयुक्त रूपमा काम गर्नुपर्नेमा जोड दिनुभयो । उहाँले दसैँ–तिहारको पर्यटकीय सिजनअघि नै भारत र चीनमा प्रवर्द्धनात्मक कार्यक्रम सञ्चालन गर्नुपर्ने बताउनुभयो । नेपाल पर्यटन बोर्डको मुख्य जिम्मेवारी पर्यटन प्रवर्धन र सहजीकरण भएकाले विपद्पछिको अवस्थामा यस्ता कार्यक्रमलाई तीव्रता दिनुपर्ने उहाँको भनाइ छ ।

उहाँले भन्नुभयो, ‘नेपाल टुरिजम बोर्डले दसैँ–तिहार अगाडि नै भारत र चीनमा गएर नेपाल प्रमोसन गर्नुपर्ने आवश्यकता छ ।

 भोटेकोसीको कोरिडोरमा यो विपत्ति भएको हो, नेपालभरि त होइन । नेपाल काठमाडौँ, चितवन, पोखरा लगायत त सबै नर्मल नै छ । यो मेसेज हामीले स्ट्रङली दिनुपर्छ । हाम्रा संसारभरि छरिएका हाम्रा नेपाली एम्बेसीहरू र नेपाल टुरिजम बोर्ड, हामी निजी क्षेत्र सबै जना यसमा लागि परेका छौँ । अझ यसलाई स्टेप–अप गर्नुपर्छ, अझ बढाउनुपर्छ, प्रवर्धन कार्यक्रम अविलम्ब छिटो भन्दा छिटो जानै पर्ने अवस्था छ । त्यो गरेको खण्डमा हामीले धेरै बजार गुमाउँदैनौँ । फेरि पनि हामीले फेरि त्यसलाई रिकभर गर्न सक्ने अवस्था छ ।’

उहाँकाअनुसार नेपाल आउने पर्यटकहरू अधिकांश पदयात्रा, पर्वतारोहण र ¥याफ्टिङ जस्ता साहसिक पर्यटनमा आकर्षित हुने गरेका छन् । यस्ता पर्यटक जोखिमबारे जानकार हुने भएकाले प्राकृतिक विपत्तिका कारण समग्र नेपालको पर्यटन प्रभावित हुने अवस्था आउन नदिन वास्तविक अवस्थाबारे सही सूचना सम्प्रेषण गर्नुपर्ने उहाँले बताउनु भयो । उहाँले भूकम्प र कोभिड महामारीका बेला पनि नेपाली पर्यटन क्षेत्रले चुनौती सामना गरेको स्मरण गर्दै यस पटक पनि सरकार र निजी क्षेत्र बिच समन्वय गरेर योजनाबद्ध रूपमा अघि बढे पर्यटन क्षेत्रलाई पुनरुत्थान गर्न सकिने विश्वास व्यक्त गर्नुभयो ।

अन्तर्राष्ट्रिय एयरलाइन्समार्फत नेपालको प्रवर्धन गर्न सुझाव
अध्यक्ष साहले नेपालको पर्यटन पुनरुत्थानका लागि अन्तर्राष्ट्रिय एयरलाइन्सहरूको विश्वव्यापी सञ्जाललाई समेत उपयोग गर्नुपर्ने बताउनु भयो ।

टर्किस एयरलाइन्स, सिंगापुर एयरलाइन्स, क्याथे प्यासिफिक र कतार एयरवेजलगायतका एयरलाइन्ससँग सहकार्य गरी नेपाल भ्रमणसम्बन्धी सकारात्मक सन्देश विश्व बजारमा पु¥याउनुपर्ने उहाँको भनाई छ ।

नेपालमा पर्यटकको आगमन बढ्दा एयरलाइन्सको व्यवसायसमेत विस्तार हुने भएकाले नेपालको पर्यटन प्रवर्द्धनमा उनीहरूको सहकार्य उपयोगी हुने उहाँले बताउनु भयो । पोखरामा सेप्टेम्बर २३ देखि फ्लाई दुबईले दैनिक उडान सुरु गरेपछि नेपालको पर्यटन क्षेत्र सामान्य अवस्थामा फर्किरहेको सन्देश गएको उहाँको भनाई छ ।

विपद्पछिको पर्यटन पुनरुत्थानका लागि राष्ट्रिय तथा अन्तर्राष्ट्रिय साझेदार, नेपाललाई सहयोग गर्न इच्छुक संस्था र व्यक्तिहरूलाई एकीकृत गर्दै स्पष्ट कार्य योजनासहित अघि बढ्न आवश्यक रहेको उहाँले बताउनु भयो । नेपालको पर्यटन क्षेत्रसँग चुनौती सामना गरेको अनुभव र पुनरुत्थान गर्ने क्षमता दुवै रहेको उहाँको भनाई छ ।

उहाँले भन्नुभयो, ‘विपद्पछि हामी योजनाबद्ध किसिमले अगाडी जानुपर्छ । यसमा राष्ट्रिय, अन्तर्राष्ट्रिय नेपाललाई माया गर्ने संस्थाहरू, व्यक्तिहरूलाई संगठित गराएर हामीले एउटा मास्टर प्लान बनाएर अगाडि जानुपर्छ । हामीले सरकारलाई के पनि भनिरहेका छौँ भने संसारका १० वटा ठूला–ठूला एयरलाइन्सहरू मध्ये ५–६ वटा नेपालमा आउनुहुन्छ, संसारभरिको उहाँहरूको जुन रिच छ, त्यसलाई हामीले पर्यटन प्रवर्द्धनमा प्रयोग गर्नुपर्छ ।

अन्तर्राष्ट्रिय एयरलाइन्सहरू जस्तो टर्किस एयर अथवा हाम्रो सिंगापुर एयरलाइन्स, क्याथे प्यासिफिक, कतार एयरवेज, उहाँहरूलाई हामीले रिक्वेस्ट गरेर संसारभरिमा नेपाल ठीक छ, नेपाल घुम्न जानुहुन्छ भनेर प्रचार–प्रसार गर्न लगाउनुपर्छ । नेपालमा बढी पर्यटक आउनु भनेको उहाँहरूको पनि बिजनेस बढ्ने हो, अर्को जुन पोखरामा फ्लाई दुबईले डेली फ्लाइट सुरु गरेको छ, सेप्टेम्बर २३ देखि त्यसले पनि संसारभरमा सकरात्मक म्यासेज गएको छ । हामीले हामीले दसैँ–तिहार अगाडी नै एउटा योजनाबद्ध किसिमले मास्टर प्लान बनाएर अगाडि बढेको खण्डमा सिजनमा हामीले धेरै नोक्सानी बेहोर्नुपर्दैन, पर्यटकलाई फेरि पुनरुत्थान गर्न सक्ने हामीसँग त्यो क्षमता छ, अनुभव छ, त्यसैले हामी अगाडि बढ्ने हो । सरकार र हामी निजी क्षेत्र हातेमालो गरेर बढेको नै छौँ ।’

उहाँले दशैँ–तिहारको मुख्य पर्यटकीय सिजनमा हुनसक्ने आर्थिक क्षति न्युनिकरण गर्न तत्काल प्रवर्धन, प्रभावकारी सूचना सम्प्रेषण र समन्वित कार्ययोजनालाई प्राथमिकता दिनुपर्ने बताउनु भयो । पछिल्लो समय पर्यटकको बुकिङ रद्ध हुने क्रम घट््दै गएको उहाँको भनाई छ । साथै
उहाँले पर्यटन व्यवसायी, होटलका कर्मचारी तथा विपद्बाट प्रभावित व्यवसायीलाई राहत उपलब्ध गराउन पनि आग्रह गर्नुभयो । होटल संघले आफ्ना अन्तर्राष्ट्रिय सम्पर्क र ट्राभल एजेन्टमार्फत ‘नेपाल कलिङ, नेपाल नाउ’ अभियान सञ्चालन गर्दै नेपाल भ्रमणका लागि सुरक्षित र उपयुक्त गन्तव्य रहेको सन्देश प्रवाह गरिरहेको उहाँको भनाई छ । –न्युज एजेन्सी नेपाल