भक्तपुर पेप्सिकोलास्थित सनसिटी अपार्टमेन्टको एकै परिवारमा तीन जनाको र्यापिड टेष्टमा पोजेटिभ आएपछि अस्पताल भर्ना गरिएको छ ।
उनीहरुलाई पाटन अस्पतालमा भर्ना गरिएको छ । पीसीआर विधिबाट नमुना संकलनका लागि उनीहरुको थ्रोट स्वाब लिइएको अस्पतालका निर्देशक विष्णु शर्माले बताए ।अपार्टमेन्टको इ ब्लकमा बसिरहेका उनीहरु १८ दिनअघि बेलायतबाट आएका हुन् ।
महानगरीय प्रहरी वृत्त नयाँबानेश्वरका प्रमुख, डिएसपि दुर्गाराज रेग्मीले कोरोना पोजेटिभ देखिएका तीनैजनालाई पाटन अस्पतालमा आइसोलेशनमा पठाइएको पुष्टी गरे । उनका अनुसार सनसिटी अपार्टेमेन्टलाई प्रहरीले सील गरेको छ ।
कहिलेकाहीँ र्यापिड किटले शरीरमा कोरोना भाइरसविरुद्ध लड्ने एन्टिबडी देखाए पनि कोरोना भाइरस नहुन सक्छ। बाग्लुङकी एक महिलाको परीक्षणमा किटले पोजेटिभ देखाए पनि पिसिआर परीक्षण गर्दा नेगेटिभ देखिएको थियो।
एन्टिबडीले कोरोना भाइरस नष्ट गरिसकेपछि पनि शरीरमा एन्टिबडी कायमै रहन्छ। त्यसैले कहिलेकाहीँ डाइग्नोस्टिक परीक्षणमा एन्टिबडी देखाए पनि कोरोना भाइरस भने नष्ट भइसकेको हुन सक्छ।
