कोरोनाभाइरस कोभिड-१९ को संक्रमणको दोस्रो चरण आउनसक्ने त्यसले संक्रमण अझै बढ्नसक्ने त्रासमा विश्वकै प्रमुख देशहरुको आर्थिक बजार निकै खस्किएको छ ।
अमेरिकी केन्द्रीय बैंकले संक्रमणका कारण उत्पन्न भएको आर्थिक संकटबाट माथि उक्लन धेरै समय लाग्ने प्रतिक्रिया दिएको अर्को दिन नै अमेरिकी सहित यूरोप र एशियाका शेयर बजार समेत ओरालो लागेको छ ।
अमेरिकामा मात्रै प्रमुख तीनवटा आर्थिक सूचकहरु एकहप्ता यताकै न्यून स्थानमा पुगेका छन् । संक्रमणसंगै दुई हप्ता देखि भइरहेको आन्दोलनले अमेरिकाको शेयर बजार निकै प्रभावित बनाएको छ ।
तेलको मूल्यमा आएको गिरावटले उर्जा र ट्राभल टुर क्षेत्र सबैभन्दा बढी मारमा परेका छन् । त्यहाँ कामबाट निकालिएर वेरोजगारी भत्ताको दावी गर्नेहरुको सङ्ख्या १५ लाख पुगिसकेको छ । यूरोपमा १०० अंकले ओरालो लागेको बेलायतको शेयर बजारमा ४ प्रतिशत नोक्सानी भएको छ भने जर्मनी, फ्रान्सलगायतका मुलुकमा साढे चार प्रतिशतले गिरावट आएको छ ।
एशियाली बजारमा पनि प्रमुख शेयर कारोवारहरु खस्किरहेको छ ।
देशहरुले आर्थिक गितिविधी सञ्चालन गर्न शुरु गरेपनि संक्रमण फेरी बढ्न सक्ने आशंकामा लगानीकर्ताहरुले चासो नदिंदा र मानिसहरुको गतिविधी सामान्य नहुँदा त्यसको मारमा शेयर बजार परेको हो ।।