नयाँ दिल्ली,१ असोज। कोरोना भाइरस संक्रमणबाट अति प्रभावित देश भारतलाई रुसले १० करोड डोज कोरोना विरुद्धको खोप उपलब्ध गराउने भएको छ । रुसी खोप निर्माता कम्पनीले स्पुतनिक भी नामक कोरोना विरुद्धको खोप विकास गरेको हो ।
सो कम्पनीले भारतको रेड्डी लेबोरेटोरिजलाई खोप उपलब्ध गराउने जनाएको हो । भारतमा स्पुतनिक भी खोपको क्लिनिकल परीक्षण र खोप वितरणका लागि रुसी कम्पनी र विश्वविख्यात औषधि उत्पादक कम्पनी डा रेड्डीबीच सम्झौता भएको हो । रुसले भारतीय नियामक निकायबाट अनुमति पाए लगत्तै स्पुतनिक खोपको आपूर्ति गरिने जनाएको छ ।
भारतमा कोभिड–१९ विरुद्ध लड्न स्पुतनिक भी खोप विश्वासिलो विकल्प हुने विश्वास भारतीय अधिकारीहरुको छ । भारत विश्वमै कोरोना भाइरसका कारण सर्वाधिक असर परेको मुलुकका रुपमा देखिएको छ ।