कोरोनाभाइरसले विश्वभर नै पाइला राख्दैछ । यस भाइरसको कहर महिनौंदेखि निरन्तर जारी छ । रोकिने, कम हुने कुनै संकेत छैन । भारतीय फिल्म उद्योगमा पनि कोरोनाको असर देखिएको छ । हालै मात्र हिन्दी फिल्मका सदाबहार पाश्र्वगायक कुमार सानु पनि कोरोना संक्रमित भएका छन् ।
कुमार सानु आफ्ना परिवारका सदस्य भेट्न अमेरिकाको लस एन्जलस जाने कार्यक्रम थियो । यसअघि नै उनी संक्रमित भेटिए, र उनको योजना पनि रद्द भएको छ । यस सम्बन्धी खबर उनले फेसबुक पेजबाट दिएका छन् । उक्त पोस्टमा उनले लेखेका छन्ः “दुर्भाग्यवस सानु दा (कुमार सानु)मा कोरोना पोजेटिभ देखियो ।” खबर अनुसार कुमार सानुको मुम्बईस्थित घरलाई सिल गरिएको छ ।
हालै मात्र सानुले संचार माध्यमसँग कुरा गर्दै पूरै लकडाउन अवधिमा आफूले काम गरेको जानकारी दिएका थिए । नौ महिनादेखि आफ्ना परिवारका सदस्यसँग भेट नभएको भन्दै उनले आफू चाँडै लसएन्जलस जाने योजना बनाएको बताएका थिए । उनकी पत्नी र छोरीहरु अमेरिकाको लसएन्जलसमा बस्ने गर्दछन् ।
अहिले कुमार सानु क्वारेन्टिनमा छन् ।
कुमार सानुका छोरा जन सानु बिस बोसको घरमा छन् । जन सानुले बिग बोसमा आफ्ना निजी जिन्दगीका अनेक पाटा खोल्दैछन् । (एजेन्सी)
