१७ चैत्र, काठमाडौं । भारतीय सेनाले नेपाली सेनालाई एक लाख कोभिड–१९ विरुद्धको खोप उपहारस्वरुप प्रदान गरेको छ।
गत जनवरीमा ‘खोप मैत्री’ कार्यक्रम अन्तर्गत नेपाललाई दश लाख कोभिड–१९ विरुद्धको खोप प्रदान गरे पश्चात फेरि पनि भारतीय सेनाले नेपाली सेनालाई थप एक लाख कोभिड–१९ विरुद्धको कोभिशिल्ड खोप उपहारस्वरुप प्रदान गरेको हो ।
भारतले अबलम्बन गरेको ‘छिमेकी पहिलो’को नीति अन्तर्गत भारतीय सेनाका सेनाध्यक्ष जनरल मनोज मुकुन्द नरवणेले आफ्ना नेपाली समकक्षी जनरल पूर्णचन्द्र थापालाई टुडिखेलस्थित नेपाली सेनाको मुख्यालय जङ्गी अड्डामा आज आयोजना गरिएको एक समारोहकाबीच भिडियो कन्फरेन्स मार्फत उक्त खोप प्रदान गर्नुभएको थियो ।
सोमबार बेलुकी भारतको पुणेस्थित सिरम इन्टिच्यूटबाट एयर इण्डिया विमान मार्फत त्रिभुवन अन्तर्राष्ट्रिय विमानस्थलमा ल्याइएको उक्त खोप नेपालका लागि भारतका राजदूत श्री विनय मोहन क्वात्राले नेपाली सेनालाई हस्तान्तरण गर्नुभएको हो ।