कैलाली , १४ जेठ
सुदूरपश्चिम प्रदेश सरकारमा ४ मन्त्री थप गरिएको छ । प्रदेशका मुख्यमन्त्री त्रिलोचन भट्टले शुक्रबार सरकार पुनर्गठन गर्नुभएको हो ।
प्रदेश सरकारको सामाजिक विकासमन्त्रीमा पूर्णा जोशी, आन्तरिक मामिला तथा कानुनमन्त्रीमा लालबहादुर खड्का, भौतिक पूर्वाधार विकासमन्त्रीमा दीर्घ सोडारी र उद्योग वन तथा वातावरणमन्त्रीमा मानबहादुर धामी नियुक्त हुनुभएको छ ।
त्यस्तै राज्यमन्त्रीहरुमा चुनकुमारी चौधरी, मनाकुमारी साउद, अर्चना गहतराज र मानबहादुर सुनार राज्यमन्त्री बन्नुभएको छ ।
तारा लामा तामाङलाई मन्त्री बनाउनकै लागि आजै प्रमुख सचेतकबाट हटाइए पनि उहाँले पार्टीमा विवाद रहेको भन्दै मन्त्री पद अस्वीकार गर्नुभएको थियो ।
यस्तै नेकपा एमालेका नवनियुक्त प्रमुख सचेतक लालबहादुर खड्कालाई आन्तरिक मामिला तथा कानुन मन्त्रालयको जिम्मेवारी दिइएको छ ।
आन्तरिक मामिला तथा कानुन मन्त्रालयको जिम्मेवारी पाउनुभएका प्रकाश शाहलाई आर्थिक मामिला मन्त्रालयको जिम्मेवारी पनि दिइने भएको छ ।
