विराटनगर । कोशी प्रदेशसभामा आज सभामुखको निर्वाचन हुने भएको छ । प्रदेशसभाको कार्यव्यवस्था परामर्श समितिको बैठकले ३ बजे सभामुखको निर्वाचन गर्ने गरी कार्यसूची प्रकाशित गर्ने निर्णय गरेको छ ।
उपसभामुख सिर्जना दनुवारले आज निर्वाचनमा गएर भए पनि सभामुखको टुंगो लगाउन कार्यव्यवस्थामा सहमति भएको जानकारी दिईन् ।
सत्तारुढ दलहरूले राप्रपालाई सभामुख दिने सहमति भएका छन् । राप्रपाले पनि झापाका प्रदेशसभा सदस्य अम्बरबहादुर बिस्टलाई सभामुख बनाउने निर्णय गरिसकेको छ । राप्रपाले दलीय सहमतिको आधारमा सभामुख पद लिने निर्णय गरेको हो। बिस्ट निर्विरोध निर्वाचित हुने सम्भावना रहेको छ ।
सभामुखबारे औपचारिक निर्णय गर्न कांग्रेस संसदीय दलको बैठक जारी रहेको छ । बैठकमा सभामुख चयन प्रक्रियालगायत विषयमा छलफल गरिरहेको प्रदेशसभा सदस्य अमृत अर्यालले जानकारी दिए ।
नेकपा एमालेले सभामुखमा राप्रपालाई सघाउने निर्णय गरेको छ ।
बैठकपछि प्रमुख सचेतक रेवती भण्डारीले भने,‘सभामुखमा एमालेले उम्मेद्वारी दिदैन । गठबन्धन बाहेकका उम्मेदवारलाई सघाउछ ।’
सत्तारुढ दलहरूले राप्रपालाई सभामुख दिने सहमति भएका छन् । राप्रपाले झापाका प्रदेशसभा सदस्य अम्बरबहादुर बिस्टलाई सभामुख बनाउने निर्णय गरेको छ । यससँगै बिस्ट निर्विरोध निर्वाचित हुने सम्भावना रहेको छ ।
