काठमाडाैँ – सभामुख डोलप्रसाद अर्यालले नेपाललाई सस्तो गन्तव्यको रूपमा होइन, उच्च मूल्य, गहिरो अनुभव र दिगो विकासमा आधारित आरोग्य पर्यटन गन्तव्यका रूपमा स्थापित गर्नुपर्ने आवश्यकता औँल्याउनुभएको छ।
बुधबार काठमाडाैँमा आयोजित ‘अन्तर्राष्ट्रिय आरोग्य दिवस’ को अवसरमा आयोजित कार्यक्रमलाई सम्बोधन गर्दै सभामुख अर्यालले नेपाललाई ‘बजेट गन्तव्य’ को छविबाट बाहिर निकाल्दै ‘प्रिमियम आरोग्य गन्तव्य’ का रूपमा विकास गर्नुपर्नेमा जोड दिनुभयो। उहाँले केवल पर्यटकको संख्या बढाउने लक्ष्यले मात्र आर्थिक समृद्धि सम्भव नहुने भन्दै पर्यटकले पाउने अनुभवको गुणस्तर र गहिराइ नै मुख्य आधार हुनुपर्ने बताउनुभयो।
उहाँका अनुसार आरोग्य पर्यटनमा आउने पर्यटकहरू सामान्य पर्यटकभन्दा बढी खर्च गर्ने र लामो समय बस्ने स्वभावका हुन्छन्। उनीहरू विलासिता मात्र होइन, आत्मिक शान्ति र जीवनको अर्थ खोज्दै यात्रा गर्ने भएकाले नेपालका हिमालय, पवित्र नदी, योग, ध्यान र प्राचीन आध्यात्मिक परम्परा उनीहरूका लागि विशिष्ट आकर्षण बन्न सक्ने उहाँको भनाइ थियो।
कार्यक्रममा उहाँले संयुक्त राष्ट्र संघको महासभाले नेपालको प्रस्तावमा वैशाख २ (अप्रिल १५) लाई ‘अन्तर्राष्ट्रिय आरोग्य दिवस’ का रूपमा मान्यता दिनु ऐतिहासिक उपलब्धि भएको उल्लेख गर्नुभयो। उक्त दिवसले मानव जीवनको समग्र कल्याणलाई विश्वव्यापी प्राथमिकतामा राख्ने सशक्त सन्देश दिएको उहाँको भनाइ थियो।
सभामुख अर्यालले आरोग्यलाई केवल रोग नहुनु मात्र नभई शारीरिक, मानसिक, सामाजिक, सांस्कृतिक, भावनात्मक, आध्यात्मिक र वातावरणीय सन्तुलनको समग्र अवस्था भएको स्पष्ट पार्नुभयो। आजको विश्वमा बढ्दो मानसिक तनाव, जलवायु परिवर्तन, द्वन्द्व र असन्तुलित जीवनशैलीका बीच आरोग्य अवधारणाले मानवतालाई नयाँ दिशा दिन सक्ने उहाँले बताउनुभयो।
उहाँले नेपालका हिमाल, लुम्बिनी, कर्णालीको रारा, मनाङ, मुस्ताङदेखि बडिमालिका र खप्तडसम्मका क्षेत्रलाई आत्मिक अनुभवका गन्तव्यका रूपमा विकास गर्न सकिने बताउँदै प्रकृति, संस्कृति र आध्यात्मिकतालाई एकीकृत गरी नयाँ पर्यटन मोडेल निर्माण गर्नुपर्नेमा जोड दिनुभयो। साथै स्थानीय समुदायको सहभागिता, स्पष्ट नीति र दिगो विकासमा आधारित प्रणाली आवश्यक रहेको पनि उहाँले उल्लेख गर्नुभयो।
सभामुख अर्यालले नेपालसँग रहेको योग, ध्यान, आयुर्वेद, प्राकृतिक चिकित्सा र परम्परागत जीवनशैलीलाई विश्व बजारमा प्रस्तुत गर्न सकिए नेपाललाई आरोग्य पर्यटनको प्रिमियम गन्तव्यका रूपमा स्थापित गर्न सकिने विश्वास व्यक्त गर्नुभयो।
