काठमाडौँ – पिएसजीका खेलाडी र प्रशिक्षक २०२६ को च्याम्पियन्स लिग फुटबलको उपाधि जितेपछि खुसी साटासाट गर्दै । तस्बिरः एपीपेरिस सेन्ट-जर्मेन (पीएसजी) ले लगातार दोस्रो पटक यूईएफए च्याम्पियन्स लिगको उपाधि जित्दै युरोपेली फुटबलमा आफ्नो दबदबा कायम राखेको छ। शनिबार बुडापेस्टमा भएको रोमाञ्चक फाइनलमा पीएसजीले आर्सनललाई पेनाल्टी सुटआउटमा ४–३ ले पराजित गर्दै उपाधि रक्षा गर्यो।
निर्धारित ९० मिनेट र अतिरिक्त समयमा खेल १–१ को बराबरीमा किएको थियो। खेलको छैटौं मिनेटमै काइ हाभार्जकोख गोलबाट आर्सनलले अग्रता लिएको थियो। तर ६५औं मिनेटमा ओस्मान डिम्बेलेले पेनाल्टीमार्फत बराबरी गोल फर्काएपछि खेल अतिरिक्त समयमा पुगेको थियो।
पेनाल्टी सुटआउटमा आर्सनलका डिफेन्डर ग्याब्रियलले निर्णायक प्रहार बारमाथि प्रहार गरेपछि पीएसजीले लगातार दोस्रो युरोपेली उपाधि जित्न सफल भयो। आर्सनलकै अर्का खेलाडी एजेले हानेको पेनाल्टी पनि गोलमा परिणत हुन सकेको थिएन ।
पीएसजीका कप्तान मार्किनोसले उपाधि जित्नु अविश्वसनीय उपलब्धि भएको प्रतिक्रिया दिए। प्रशिक्षक लुइस हेनरिकले पनि तेस्रो पटक च्याम्पियन्स लिग जित्दै आफूलाई युरोपका सर्वकालीन सफल प्रशिक्षकमध्ये एकको रूपमा स्थापित गरेका छन्।
लगातार दुई पटक उपाधि जित्ने पीएसजी आधुनिक च्याम्पियन्स लिग इतिहासमा रियल म्याड्रिड पछि यो उपलब्धि हासिल गर्ने दोस्रो टोली बनेको छ।
आर्सनलका प्रशिक्षक मिकेल आर्टेटाले हारपछि पीएसजीलाई विश्वकै उत्कृष्ट टोलीको संज्ञा दिँदै आफ्ना खेलाडीले पीडाबाट सिकेर अझ बलियो बन्नुपर्ने बताए।
पीएसजीको युवा टोलीले फेरि एकपटक आफ्नो क्षमता प्रमाणित गरेको छ। बुडापेस्टमा औसत उमेर २४ वर्षभन्दा कम रहेको टोली मैदान उत्रिएको थियो, जसले भविष्यमा पनि युरोपेली फुटबलमा प्रभुत्व कायम राख्ने संकेत दिएको छ।
