काठमाडौँ – यमपञ्चकको उल्लासमय साँझमा काठमाडौं उपत्यका प्रकाशको एक भव्य महासागरमा परिणत भयो । तिहारको अवसरमा परम्परागत माटोका पाला, तेलका दियो र आधुनिक रङ्गीविरङ्गी विद्युतीय झिलिमिलीले सिङ्गारिएपछि सिंगो उपत्यका आकाशका ताराहरू धर्तीमै ओर्लिएझैँ चहकिलो र मनमोहक देखियो ।

ऐतिहासिक तथा धार्मिक महत्व बोकेको स्वयम्भूनाथ महाचैत्य डाँडाको शिखरदेखि उपत्यकाका मुख्य राजमार्गहरूमा बगेका प्रकाशका लामहरूसम्म, काठमाडौं, ललितपुर र भक्तपुरका हरेक घर, चोक र गल्लीहरू उज्यालोको अनुपम सौन्दर्यमा डुबेका छन् । साँझ ढल्नासाथ घरघरमा बालिएका बत्तीहरूले कचौरा आकारको उपत्यकालाई सुनौलो आभाले ढाकेको छ । मुख्य सडकहरूमा गुडिरहेका सवारी साधनका बत्तीहरूले रातको क्यानभासमा सुनको नदी बगेको भान गराएका छन् ।
‘अन्धकारमाथि प्रकाशको विजय र निराशामाथि उमङ्गको सञ्चार गर्दै काठमाडौं उपत्यका दीपको महासागर बनेको छ ।’

उचाईबाट हेर्दा रत्नझैँ टल्किएको उपत्यकाको विहङ्गम दृश्य नियाल्न स्वयम्भू, डाँडाकाँडा र घरका छतहरूमा सर्वसाधारणको बाक्लो उपस्थिति देखिन्थ्यो । हातमा फूलझरी (झिरझिरे) बालेर पर्वको खुशी साट्दै गरेका युवतीहरू, बालबालिकाको हाँसो र भुइँचम्पाको चहकिलो चमकले तिहारको सांस्कृतिक गरिमालाई अझ प्रगाढ बनाएको छ । सहरका आधुनिक गगनचुम्बी भवन र ऐतिहासिक धरहरा समेत तिहारको रङ्गीन प्रकाशमा ठडिएका छन् । अन्धकारलाई परास्त गर्दै नयाँ आशा, समृद्धि र शान्तिको सन्देश छर्ने यो उज्यालोको पर्वले उपत्यकावासीको मुहारमा मात्र होइन, सिंगो वातावरणमै एक जादुयी तरङ्ग पैदा गरेको छ । तिहारको यो अनुपम झिलिमिलीले काठमाडौंलाई केवल शहर मात्र नभई उज्यालोको जीवित उत्सवका रूपमा प्रश्तुत गरेको छ ।– न्युज एजेन्सी नेपाल
तस्बिरहरुः अनुप प्रधान, न्युज एजेन्सी नेपाल