विश्व स्वास्थ्य संगठनले कोभिड-१९ हालसम्म घोषणा गरिएको सबैभन्दा गम्भीर विश्वव्यापी स्वास्थ्य संकट भएको बताएको छ । विश्व स्वास्थ्य संगठनको आपतकालीन समितिको समीक्षाका क्रममा सो निस्कर्ष निकालिएको हो ।

विश्वमा इबोला, जिका, पोलियो र स्वाइन फ्लुले पनि विश्वव्यापी संकट निम्त्याएको डब्लुएचओको भनाई छ । विश्वमा गएको जनवरी महिनायता मात्रै १ करोड ६६ लाखभन्दा बढी मानिसमा कोरोना भाइरसको संक्रमण भइसकेको छ । यसै गरी ६ लाख ५५ हजारभन्दा बढी मानिसको कोरोना संक्रमणकै कारण मृत्यु भइसकेको छ ।

विश्व स्वास्थ्य संगठनले ३० जनवरीमा विश्वव्यापी स्वास्थ्य संकटकाल घोषणा गर्दा चीन बाहेकका मुलुकमा १ सयभन्दा पनि कम मानिसमा संक्रमण फैलिएको थियो भने एक जनाको पनि मृत्यु भएको थिएन । कोभिड-१९ ले विश्व नै परिवर्तन गरेको छ । यसले व्यक्ति, समुदाय र देशहरु आपसमा मिलेर यस संकट विरुद्ध लड्न प्रेरित गरेको डब्लु एच ओ को ठहर छ ।

पछिल्लो ६ हप्तामा कोरोना संक्रमणको दर दोब्बर वृद्धि भएको छ । विश्वमा पछिल्लो २४ घन्टामा मात्रै २ लाख १२ हजारभन्दा बढी नयाँ संक्रमित थपिएका छन् । यसै गरी बतेको २४ घन्टामा कोरोनाकै कारण मृत्यु हुनेको संख्या पनि झण्डै ४ हजारको हाराहारीमा छ । यो संख्या विगत केही दिनको तुलनामा कम हो । विश्वमा कोरोना संक्रमणका कारण संयुक्त राज्य अमेरिका, ब्राजिल र भारत सबैभन्दा प्रभावित छन् ।