काठमाडौं । ३ वर्षपछि रसुवागढी नाकाबाट मानव आवागमन खुला भएको छ । चीनले आज बाट रसुवागढी नाकाबाट स्थलमार्ग हुँदै पर्यटक आवागमन खुला गरेको हो ।
नेपाल सरकारले कोभिड-१९ महामारीका कारण २०७६ चैत ११ गते सबै अन्तर्राष्ट्रिय नाका बन्द गर्ने निर्णय गरेको थियो ।
नाकाबाट चीन प्रवेश गरेको नेपाली टोलीलाई स्वागत गर्दै नेपालका लागि चिनियाँ राजदूत छेन सङले दुईतर्फी रुपमा मानिसको आवागमन खुलाले द्विपक्षीय सहयोग र जनताबीचको सम्बन्ध अझ गहिरो हुने उल्लेख गर्नुभएको नेपाल स्थित चिनियाँ दूतावासले जनाएको छ ।
गत बिहिबार सुवागढी र केरुङ नाकामा दुईतर्फी व्यापार र जनताको आवतजावत पूर्णरूपमा सञ्चालन गर्ने सहमति भएको थियो ।
कोभिड–१९ को प्रतिक्रियामा दुवै देशले हालै अपनाएका नीतिलाई मध्यनजर गर्दै दुवै पक्षले नेपाल–चीन संयुक्त महामारी रोकथाम तथा नियन्त्रण संयन्त्रको नाम परिवर्तन गरी सीमा व्यापार तथा सहयोगसम्बन्धी नेपाल–चीन समन्वय संयन्त्र राख्ने सहमति गरेका छन् ।
