काठमाडौं – इन्डियन प्रिमियर लिग अन्तर्गत आइतबार सम्पन्न खेलमा मुम्बई इन्डियन्समाथि २ विकेटको सनसनीपूर्ण जित निकाल्दै रोयल च्यालेन्जर्स बेंगलुरु अङ्क तालिकाको शीर्ष स्थानमा उक्लिएको छ । अन्तिम बलमा मात्र निर्णय भएको यस खेलमा हार व्यहोरेसँगै पाँच पटकको च्याम्पियन मुम्बई इन्डियन्स भने यस सिजनको प्लेअफ दौडबाट बाहिरिएको छ।
मुम्बईले दिएको १६७ रनको लक्ष्य बेंगलुरुले २०औँ ओभरको अन्तिम बलमा ८ विकेट गुमाएर पूरा गर्यो । बेंगलुरुको जितमा क्रुणाल पाण्ड्या नायक बने। उनले ४६ बलमा ७३ रनको उत्कृष्ट अर्धशतकीय इनिङ्स खेल्दै टोलीको जितको आधार तय गरे । मुम्बईका बलर कोर्बिन बोशले ४ विकेट लिँदै खेललाई अन्तिम समयसम्म रोमाञ्चक बनाए पनि बेंगलुरुलाई रोक्न पर्याप्त भएन।
यसअघि टस हारेर पहिले ब्याटिङ गरेको मुम्बई इन्डियन्सले निर्धारित २० ओभरमा ७ विकेट गुमाउँदै १६६ रन बनाएको थियो। मुम्बईका लागि तिलक वर्माले ४२ बलमा ५७ रन र नमन धिरले ३२ बलमा ४७ रन जोडेका थिए। बेंगलुरुका बलर भुवनेश्वर कुमारले घातक बलिङ गर्दै ४ ओभरमा मात्र २३ रन खर्चेर ४ महत्त्वपूर्ण विकेट लिएका थिए।
यो जितसँगै बेंगलुरु १४ अङ्कसहित तालिकाको पहिलो स्थानमा पुगेको छ । समान १४ अङ्क नै भए पनि सनराइजर्स हैदराबादलाई नेट रनरेटका आधारमा पछि पार्दै बेंगलुरुले शीर्ष स्थान कब्जा गरेको हो।
यता, मुम्बईका लागि भने यो हारले प्लेअफको ढोका बन्द गरिदिएको छ। अब बाँकी रहेका सबै खेल जिते पनि मुम्बईको अधिकतम १२ अङ्क मात्र पुग्नेछ, जुन प्लेअफमा स्थान सुरक्षित गर्न गणितीय रूपमा अपर्याप्त हुनेछ।
