काठमाडौँ– प्रतिनिधिसभाको दोस्रो बैठक पनि विपक्षी दलहरूको अवरोधका कारण स्थगित भएको छ । प्रमुख प्रतिपक्षी दल नेपाली कांग्रेसले प्रधानमन्त्रीको सदनमा उपस्थिति र जवाफको माग गर्दै बैठक अवरुद्ध गरेपछि कार्यवाही अघि बढ्न सकेन ।

कांग्रेसले प्रधानमन्त्रीलाई संसद्मा उपस्थित गराई समसामयिक विषयमा जवाफ दिनुपर्ने भन्दै सभामुखलाई रुलिङ गर्न माग गरेको थियो । सोही माग दोहोरिएपछि विपक्षी सांसदहरूले नाराबाजी गर्दै बैठक सञ्चालनमा अवरोध गरेका थिए ।

अवरोध कायमै रहेपछि सभामुखले बैठकलाई १५ मिनेटका लागि स्थगित गरेका थिए । यसअघि पनि सोही मागका कारण पहिलो बैठक अवरुद्ध भएपछि १५ मिनेटका लागि स्थगित गरिएको थियो ।

लगातार दुई बैठकमा विपक्षीको अवरोधपछि प्रतिनिधिसभाको कार्यसूची प्रभावित बनेको छ ।