काठमाडाैँ – प्रतिनिधिसभाको दोस्रो बैठक कार्यसूचीमै प्रवेश नगरी मंगलबारसम्मका लागि स्थगित गरिएको छ । सोमबार बसेको दोस्रो बैठकमा नेपाल–भारत सीमा सम्बन्धी विषयमा प्रधानमन्त्रीको अभिव्यक्तिप्रति असन्तुष्टि जनाउँदै विपक्षी दलका सांसदहरूले विरोध जनाएपछि बैठक स्थगित गरिएको हो ।
बैठक सुरु हुनेबित्तिकै विपक्षी दलका सांसदहरू आ–आफ्नो स्थानबाट उठेर विरोध जनाएका थिए । लगातारको अवरोधका कारण सभामुख डोलप्रसाद अर्यालले संसद् कानून निर्माण गर्ने महत्त्वपूर्ण थलो भएकाले कार्य सञ्चालनमा सहयोग गर्न सांसदहरूलाई आग्रह गर्नुभएको थियो ।
सभामुख अर्यालले आजका लागि तय गरिएका सबै कार्यसूची हटाइएको जानकारी दिँदै सदन सञ्चालनमा सहजीकरण गर्न पुनः अनुरोध गर्नुभएको थियो । तर, विरोध कायमै रहेपछि संसद् बैठकलाई नियमित रूपमा अघि बढाउन नसकिने अवस्था बनेको हो ।
त्यसपछि सभामुखले संसद् बैठकमा अमर्यादित व्यवहार प्रदर्शन गर्ने सांसदहरूबारे छानबिन समिति गठन गरिएको जानकारी गराउँदै बैठक मंगलबार दिउँसो १ बजेसम्मका लागि स्थगित गरिएको घोषणा गर्नुभएको थियो ।
