विराटनगर – नेपाली कांग्रेस कोशी प्रदेश संसदीय दलले प्रदेश सरकारलाई दिएको समर्थन फिर्ता लिने निर्णय गरेको छ ।
बुधबार बसेको संसदीय दलको बैठकले सरकारलाई दिएको समर्थन फिर्ता लिने निर्णय गरेको कांग्रेसका प्रमुख सचेतक गोपाल तामाङले जानकारी दिनुभयो । कांग्रेससँगको सहकार्य समाप्त भएपछि कोशी प्रदेशमा नेकपा एमाले र नेकपाको सरकार रहेको छ ।
कांग्रेसले अब प्रदेशसभामा प्रतिपक्षको भूमिकामा रहने जनाएको छ । प्रमुख सचेतक तामाङले सरकारलाई समर्थन फिर्ता लिएसँगै कांग्रेसले संसद्मा रचनात्मक प्रतिपक्षको भूमिका निर्वाह गर्ने बताउनुभयो ।
प्रदेश सरकारसँगको सहकार्य टुटेपछि कांग्रेसले औपचारिक रूपमा समर्थन फिर्ता लिने निर्णय गरेको हो । बैठकले आगामी दिनमा सरकारका कामकारबाहीलाई खबरदारी गर्दै जनहितका विषयमा प्रभावकारी रूपमा प्रतिपक्षको भूमिका निर्वाह गर्ने निष्कर्ष निकालेको छ ।
