काठमाडौँ – कलाकार जितु नेपालले काठमाडौँ महानगरपालिकालाई सफा र व्यवस्थित बनाउन महानगरवासी स्वयं सचेत र जिम्मेवार हुनुपर्ने बताउनुभएको छ ।
आइतबार काठमाडौँ महानगर प्रहरी बलको ३४ औँ वार्षिकोत्सव कार्यक्रममा बोल्दै नेपालले महानगरमा पार्किङको समस्या रहेको उल्लेख गर्दै ट्राफिक प्रहरीले गाडीमा लक लगाउने तथा पार्किङ व्यवस्थापनका कारण सर्वसाधारणले समस्या भोग्नुपरेको बताउनुभएको हो । उहाँले पार्किङ व्यवस्थापनका लागि महानगरपालिकाले थप सोच्नुपर्ने आवश्यकता रहेको बताउनु भयो ।
नेपालले महानगरलाई सफा राख्न महानगर प्रहरी तथा महानगरपालिकाले गरिरहेको कामको प्रशंसा गर्नुभयो । उहाँकाअनुसार घरमै कुहिने फोहोरलाई व्यवस्थापन गरी मल बनाउन सकिन्छ । त्यसबाट गमलामा फूल तथा अन्य बिरुवा हुर्काउन सकिने र प्लास्टिक तथा बोतलजस्ता पुनः प्रयोग वा बिक्री गर्न मिल्ने सामग्री छुट्टै सङ्कलन गर्दा फोहोरको मात्रा पनि घटाउन सकिन्छ । नेपालले घरको कुहिने र नकुहिने फोहोर एकै ठाउँमा मिसाएर फाल्ने प्रवृत्तिप्रति असन्तुष्टि जनाउनु भयो । यसरी मिश्रित फोहोर राख्दा फोहोर सङ्कलन गर्ने कर्मचारीलाई समेत काम गर्न कठिन हुने उहाँको भनाइ छ ।
उहाँले भन्नुभयो, ‘पार्किङको समस्या हामीलाई पनि छ । गाडी रोक्न मन हुँदैन, तर बाध्यता हुन्छ । ट्राफिक प्रहरीले लक लगाइदिने, गाडी उठाइदिने अवस्था आउँदा तनाव हुन्छ । त्यसैले पार्किङ व्यवस्थापनका विषयमा महानगरपालिकाले पनि सोच्न आवश्यक छ । आज कार्यक्रममा आएर वृत्तचित्र र विनोद दाइले बनाउनुभएको गीत हेर्दा महानगरपालिका वास्तवमै धेरै सफा भएको महसुस भयो । महानगरलाई सफा र व्यवस्थित बनाउन यहाँहरूको ठुलो योगदान छ । तर महानगर फोहोर बनाउने मुख्य जिम्मेवार हामी नागरिक पनि हौँ । घरबाट निस्कने कुहिने फोहोर घरमै व्यवस्थापन गरेर मल बनाउन सकिन्छ। प्लास्टिक, बोतललगायतका फोहोर छुट्टाछुट्टै राख्दा पुनः प्रयोग गर्न सकिन्छ । तर हामी सबै फोहोर एउटै ठाउँमा मिसाएर फाल्ने गर्छौँ, जसले फोहोर व्यवस्थापनमा समस्या थप्छ । त्यसैले हामी नागरिक पनि सचेत हुनुपर्छ । नियम कडा हुनुपर्छ र सबैले नियमको पालना गर्नुपर्छ ।’
उहाँले महानगर सफा राख्न नागरिकको व्यवहारमा परिवर्तनसँगै नियमको प्रभावकारी कार्यान्वयन आवश्यक रहेको बताउनु भयो । –न्युज एजेन्सी नेपाल
