काठमाडौं । सरकारले पूर्वप्रधानन्यायाधीश चोलेन्द्र शमशेर राणालाई प्रहरीले पक्राउ नगरेको स्पष्ट पारेको छ। सुरक्षा जोखिम देखिएपछि उनलाई प्रहरी कार्यालयमा लगेर सुरक्षा प्रदान गरिएको सरकारको भनाइ छ।
मन्त्रिपरिषद् बैठकपछि सञ्चारकर्मीसँग कुरा गर्दै सरकारका प्रवक्ता एवम् शिक्षा तथा खेलकुदमन्त्री सस्मित पोखरेलले राणालाई सुरक्षा खतरा रहेकाले प्रहरीको संरक्षणमा राखिएको जानकारी दिए।
उनका अनुसार राणाको परिवारबाटै सुरक्षा खतराबारे निवेदन दिइएको थियो। सोही आधारमा प्रहरीले आवश्यक सुरक्षा व्यवस्था गरेको मन्त्री पोखरेलले बताए।
राणालाई ‘जेनजी’ समूहबाट खतरा रहेको भन्ने चर्चा भने गलत भएको उनको दाबी छ। “जेनजीबाट थ्रेट भन्ने कुरा हल्ला मात्रै हो,” उनले भने।
मन्त्री पोखरेलले राणामाथि जेनजी नभई अज्ञात समूहबाट सुरक्षा खतरा रहेको बताए। सरकारले उक्त घटनालाई गिरफ्तारीका रूपमा नबुझ्न पनि स्पष्ट पारेको छ।
