लकडाउन शुरू भएको एक साता अवधिमा नेपालका विभिन्न ठाउँमा रोकिएका १३ सयभन्दा बढी पर्यटकका उद्धार गरिएको छ ।
उद्धार गरिएकाहरूमध्ये ९ सय भन्दा बढी यूरोपेली पर्यटक आआफ्नो देश फर्किएका छन् भने केही फर्किने तयारीमा रहेको पर्यटन वोर्डले जनाएको छ ।
काठमाडौंस्थित अमेरिका, जर्मनी, फ्रान्स, स्वीट्जरल्याण्ड, रूस र अस्ट्रेलियाका दूतावास र नेपाल पर्यटन बोर्ड, टेकिङ एजेन्सिज एशोसिएशन अफ नेपाल (टान) लगायत संस्थाहरूको पहलमा विभिन्न ठाउँबाट पर्यटकहरूको उद्धार गरिएको हो।
पोखरा र लुक्लाबाट भने पर्यटकसहित काठमाडौं आउनुपर्ने नेपाली सहयोगी तथा गाइडको समेत उद्धार गरिएको छ ।
यसरी उद्धार गरिएकामध्ये ३०० जना अमेरिकन पर्यटक आज (मंगलवार) कतार एयरवेजको चार्टर्ड विमानमार्फत स्वदेश फर्किंदै छन्।
बुधवार नेपाल एयरलाइन्सको विमानबाट पनि यति नै संख्यामा अस्ट्रेलियन नागरिक स्वदेश फर्किंदै छन् ।
अप्रिल १ मा अस्ट्रेलिया जान निगमको वाइडबडी जहाज बुक भएको नेपाल वायुसेवा निगमले पुष्टी गरेको छ।
सरकारले वैशाख ३गतेसम्मका लागि राष्ट्रिय तथा अन्तरराष्ट्रिय उडान रोके पनि आपत्कालीन र कार्गो उडानका लागि प्राधिकरणको अनुमति लिएर सञ्चालन गर्न सकिने व्यवस्था छ ।
सोही अनुसार अमेरिका र अस्ट्रेलियाले आफ्ना नागरिकलाई चार्टर्ड विमानमार्फत लैजान लागेका हुन् । तर आउने विमानले यात्रु लिएर आउन भने पाउँदैनन् ।
कोरोना भाइरस संक्रमण नियन्त्रण समन्वय उच्च स्तरीय उपसमितिले गत आइतवार सबै आन्तरिक तथा अन्तरराट्रिय उडान स्थगित गर्ने बैशाख ३ गते सम्मका लागी रोक्ने निर्णय गरेको थियो ।
केही दिनदेखि स्वदेशी विमान सेवा कम्पनीहरूले देशभित्रबाट पर्यटकलाई उद्धार गरी ल्याएका छन् भने चार्टर्ड उडानमार्फत पर्यटकलाई विदेश लगिएको छ ।