काठमाडौं । सरकारले अन्तर्राष्ट्रिय तथा आन्तरिक हवाई उडान आगामी जेठ २ गतेसम्म बन्द रहने भएको छ ।
कोरोना रोकथाम सम्बन्धी उच्चस्तरीय समन्वय समितिको शनिबार बसेको बैठकले तत्काल हवाई उडान सुचारु गर्न नसकिने निश्कर्ष निकालेको छ ।
सोही निश्कर्षका आधारमा हवाइ उडान बन्द गर्ने निर्णयमा सरकार पुगेको हो । यस अधि हवाई उडानहरु अप्रिल ३० अर्थात बैशाख १८ गते सम्मका लागी स्थगित थियो । यसलाई जेठ २ गते सम्म लम्ब्याउने निर्णय सरकारले गरेको हो।
लकडाउनको अबधि तथा स्वरुप कस्तो हुने भन्ने विषयमा आगामी मन्त्री परिषद बैठकले निर्णय गर्ने प्रधानमन्त्री तथा मन्त्रीपरिषद कार्यालयका सचिव नारायणप्रसाद विडारीले जानकारी दिए ।
बैठकले पहिचान परिक्षण तथा उपचारको दायरालाई बढाउने र अझै प्रभावकारी बनाउने निर्णय पनि गरेको छ । कोरोना भाइरस रोकथाम गर्न समन्वय गर्ने सबै प्रदेशका मन्त्री सहितको बैठकले हालसम्म भैरहेका काम कारवाहीको समेत समिक्षा गरेको थियो ।
