काठमाडौं । बजेटमार्फत सरकारले हवाई इन्धनमा लगाउँदै आएको पूर्वाधार करबापतको १० रुपैयाँ हटाएसँगै बुद्द एयरले हवाई भाडा घटाएको छ ।
हवाई दुरी अनुसार नेपाली यात्रुको हकमा अधिकतममा १ हजार १ सय ५ देखि न्यूनतममा २ सय २५ रुपैयाँसम्म घटाएको छ । सबभन्दा बढी धनगढीमा र कममा सिमरा गन्तव्य रहेको छ ।

बुद्द एयरले लकडाउनपछि उडानका लागि व्यापक तयारी गरिरहेको जनाएको छ । लकडाउनमा केही जहाज उडे तापनि तिनीहरुको नियमित मर्मत सम्भार तथा परीक्षणहरु गरि नै रहेको छ ।

कोभिड–१९ पछि संक्रमणबाट सुरक्षित रहनका लागि नागरिक उड्डयन प्राधिकरणले दिएको ‘गाईडलाइन’अनुसार ‘सुरक्षा निर्देशिका’ पनि ल्याईसकेको छ । सुरक्षा निर्देशिकामा यात्रु, कर्मचारी, जहाजहरुको विशेष सरसफाई, र्याम्प बस, कार्गाे, ट्रली, विभिन्न काउण्टर तथा कार्यस्थललाई कसरी सुरक्षित राख्ने भनेर ल्याइएको हो ।

सुरक्षा निर्देशिका अनुसार आफ्ना कर्मचारीहरुलाई आउने सातादेखि तालिम प्रदान गर्ने बुद्द एयरले विज्ञप्तीमार्फत जनाएको छ । त्यसैगरीी, आउने साताको अन्त्यसम्म सोही अनुसार अभ्यास गर्ने पनि जनाएको छ । यस अभ्यासले यात्रु तथा कर्मचारीको सुरक्षामा विशेष भूमिका खेल्ने विज्ञप्तिमा जनाएको छ ।