रोम । नेपोलीले युभेन्टसलाई पेनाल्टीमा ४–२ ले हराएर बुधबार राति छैटौं पल्ट इटालियन कप जितेको छ । दर्शनविहीन रंगशाला स्टाडियो ओलम्पिकोमा भएका खेलमा निर्धारित ९० मिनेटको खेल गोलरहित बराबरीमा टुंगेको थियो । कीर्तिमान १३ पल्टको इटालियन कप विजेता युभेन्टसका लागि पउल ड्याबेला र डानिलो दुवैले टाइब्रेकरमा गोल गर्न सकेनन् । नेपोलीका लागि आरकाडिस्ज मिलिकले निर्णायक विजयी गोल गरे ।

सन् २०१४ यता नेपोलीले जितेको यो पहिलो उपाधि हो । प्रशिक्षक जेनारो गगटुसाले पनि पहिलो उपाधि जितेका छन् । डिसेम्बरमा कार्लो एन्सेलोटीलाई बर्खास्त गरेयता उनले टिम सम्हालेका हुन् ।

कप उपाधि जित्ने अवसर गुमाएपछि युभेन्टसले अब आफ्नो पूरा ध्यान लिगमा केन्द्रित गर्नेछ । सिरी ए को शीर्ष स्थानमा रहेको युभेन्टसलाई दोस्रो स्थानमा रहेको लाजियोमाथि एक अंकको अग्रता मात्र प्राप्त छ ।