काठमाडौं। नेपाल प्रिमियर लिग (एनपीएल) मा कर्णाली याक्सले विजयी सुरुवात गरेको छ ।
मंगलबार कीर्तिपुरस्थित त्रिभुवन विश्वविद्यालय अन्तर्राष्ट्रिय क्रिकेट मैदानमा कर्णालीले जनकपुर बोल्ट्सलाई १९ रनले पराजित गरेको हो ।
कर्णालीले दिएको १३३ रनको लक्ष्य पछ्याएको जनकपुर १९.३ ओभरमा ११३ रनमै अलआउट भयो । उसका लागि अभिषेक तिवारीले २०, मोइन अली र कप्तान हरमित सिंहले समान १९, जेम्स निसमले १५ तथा मयान यादवले १४ रन बनाए ।
कर्णालीका उन्निस ठकुरी र हुसेन तलातले तीन–तीन विकेट लिए । नन्दन यादवले दुई तथा सोमपाल कामीले एक विकेट लिए ।
यसअघि टस हारेर पहिले ब्याटिङ गरेको कर्णालीले २० ओभरमा नौ विकेट गुमाएर १३२ रन बनाएको थियो । अरिफुल इस्लामले ४३ तथा पवन सर्राफले ३७ रन बनाए ।
जनकपुरका हरमित सिंहले तीन विकेट लिँदा मोइन अली, राहुल यादव र ललित राजवंशीले दुई–दुई विकेट लिए ।
एनपीएलअन्तर्गत मंगलबार भएको अर्को खेलमा चितवन राइनोजले विराटनगर किंग्सलाई आठ रनले पराजित गरेको छ ।
