आमा 
आजै हो म रूंदा तिमी हांसेको दिन !
आजै हो म रूंदा तिमी हांसेको दिन !नौ महिना कोखमा हुर्कायौ आमा बदला,
कयौं पटक लात्ती प्रहार गरें कति पीडा दिएं
सह्यौ आमा दिंन्न कहिल्यै अब कष्ट तिमीलाई
आजै हो आमा मैले बेस्सरी पीडा दिएको दिन ।
दिनभर धान रोपेर फर्केकी थियौ
एक्कासी प्रशव बेदनाले छट्पटियौ अंध्यारो कोठीमा
भित्ता समाउदै चिच्यायौ करायौ अनि रोयौ तिमी
आजै हो आमा तिमी मेरो कारणले रोएको दिन ।
दिनभर को थकानले शिथिल तिमी
तथापि सह्यौ मेरो कुस्ती परेड संसार देखाउन धरती टेकाउन
छुट्टै अस्तित्व मलाई दिन निरन्तर लाग्यौ तर…
आजै हो आमा म तिमी प्रति कठोर बनेको दिन ।
जन्मायौ मलाई तृतीय सन्तानको रूपमा
रूंदै थिएं धरती टेक्दै थिएं तिमी मुस्काउदै थियौ,
संसार देखायौ धरती टेकायौ आमा ऋणी छु सदैव तिमी प्रति ,
हो आमा, आजै हो म रुंदा तिमी हाँसेको दिन ।
-बोधराज रेग्मी
(दिनांक २०७७/०५/०९ )
प्रतिक्रिया
