काठमाडौं, ३० भदौ । कर्मचारी सञ्चय कोषले आफ्ना ग्राहकलाई कोरोना भाइरसको संक्रमणबाट जोगाउँन कोषबाट प्रवाह गरिने सेवालाई प्रविधिमैत्री बनाउँने भएको छ ।
विश्वका नविनतम सूचना र प्रविधिलाई अपनाएर ग्राहकलाई सेवा दिन कोषले ५९ औं वार्षिकोत्सवको अवसरमा ललितपुरको केन्द्रीय कार्यालयको नयाँ भवनमा डाटा सेन्टरको व्यवस्थापन गरेको हो । उक्त डाटा सेन्टरको उद्घाटन कोषका अध्यक्ष एवं राजस्व सचिव रामशरण पुँडासैनीले मंगलबार उद्घाटन गरेका हुन् ।
कोषले प्रवाह गर्ने सेवालाई नविनतम बनाउँन प्रविधिलाई प्राथमिकता दिइने अध्यक्ष पुँडासैनी बताउँछन् । सरकारी तथा निजी क्षेत्रका कर्मचारीहरुबाट कोषमा जम्म भएको रकमलाई देशको विकासका लागि पुर्वाधार निर्माणमा लगाउँने उनी बताउँछन् । हालसम्म कोषमा ६ लाख २८ हजार कर्मचारीको करिब ३ खर्ब ९० अर्ब रुपैयाँभन्दा बढी सञ्चित रकम जम्मा भएको छ ।
कोषले पुर्वाधार एवं ठूला परियोजनामा लगानी गरी सञ्चयकर्ताहरुलाई उच्चतम प्रतिफल दिँदै आएको पुँडासैनीले बताए ।
