दुबई,१८ असोज। इन्डियन प्रिमियर लिग अन्तर्गत गएराति (शनिबार) खेलिएको प्रतिस्पर्धामा दिल्ली क्यापिटल्सका कप्तान श्रेयस ऐयरको उत्कृष्ट प्रदर्शनले कोलकाता नाइट राइडर्सलाई १८ रनले पराजित गरेको छ ।
टस हारेर पहिले ब्याटिङको निम्तो पाएको दिल्लीका लागि श्रेयसले ३८ बलमा अविजित ८८ रनको योगदान गरेका थिए । उनले ६ छक्का र ७ चौका प्रहार गरेका थिए ।
दिल्लीका लागि फर्ममा रहेका अर्का ब्याट्सम्यान पृथ्वी शले पनि ४१ बलमा ६६ रन बनाएका थिए । शिखर धवनले २६ तथा रिषभ पन्तले ३८ रनको योगदान गरेका थिए ।
जितका लागि २२९ रनको विशाल लक्ष्य पाएको केकेआरले निर्धारित २० ओभरमा ८ विकेट गुमाएर २१० रन मात्र बनाउन सक्यो । केकेआरका लागि नितिष रानाले ५८, इओन मोर्गनले ४४ तथा राहुल त्रिपाठीले ३६ रन बनाएका थिए ।
यो जितसँगै दिल्ली क्यापिटल्सले ४ खेलबाट ६ अंक बटुल्दै शीर्ष स्थानमा उक्लेको छ । रोयल च्यालेन्जर्स बैंगलोर पनि समान ६ अंकका साथ दोस्रो स्थानमा छ ।
महेन्द्र सिंह धोनीको चेन्नाई सुपर किंग्स भने ४ खेलबाट २ अंकमात्र बनाएर अंक तालिकामा पुछारमा छ । (एजेन्सी)