ललितपुर,१८ असोज। ललितपुर महानगरपालिका वडा नं. १५ नयाँ वस्तिमा रहेको राष्ट्रिय पशुविज्ञान अनुसन्धान प्रतिष्ठानको कृषि फार्म हटाउन स्थानीयहरुले माग गरेका छन् ।
नयाँ वस्तिका स्थानीयहरु स्थानीय वडा अध्यक्ष सहित प्रतिष्ठानको कार्यालयमा पुगेर बंगुर पालन र कुखुरापालन रहेको फार्महाउस हटाउन माग गरेका हुन् । उनीहरुले फार्महाउसका कारण स्थानीय वस्तिमा दुर्गन्ध फैलिएको र विभिन्न रोगको सिकार हुनु परेको भन्दै छिटो भन्दा छिटो फार्महाउस हटाउन माग गरेका हुन् । वडा अध्यक्ष शुदर्शन मिश्रले फार्महाउसको फोहोरको दुर्गन्धले स्थानीय वस्तीमा असर परेकोले फार्म हाउसलाई उपयुक्त ठाउँमा सार्न माग गर्नुभयो । उहाँले स्थानीयहरुको माग जायज भएकाले कृषि अनुसन्धान परिषद् अन्तर्गतको प्रतिष्ठानले फार्महाउस स्थानान्तरण गरी स्थानीयको समस्या सम्बोधन गर्नुपर्ने बताउनुभयो । यस अघि पनि स्थानीय नागरिकले पटक पटक जानकारी गराउँदा समेत माग पुरा नभएकाले यसपटक अन्तिम पटक माग सहितको पत्र बुझाइएको र अब पनि माग सम्बोधन नभए सशक्त ढंगले संघर्ष गरिने बताउनुभयो ।
स्थानीयले यस अघि पनि फार्म हाउस हटाउन माग गर्दै २०७४ असार ४ गते प्रतिष्ठानलाई पत्र बुझाएका थिए । हालसम्म आफुहरुका माग पुरा नहुँदा आन्दोलित हुनुपर्ने अवस्थामा पुगेको स्थानीयहरुले बताएका छन् । उनीहरुले नागरिकको आवाज नसुन्ने सरकारी कार्यालय आफुहरुका लागि आवस्यक नभएको समेत बताएका छन् ।