एजेन्सी। बेलायतमा कोरोना भाइरसको नयाँ प्रकारको भाइरस फेला परेको र संक्रमण नियन्त्रण बाहिर गएको समाचार आएसँगै अन्य केही युरोपेली देशहरुले बेलायत माथि यात्रा प्रतिबन्धको घोषणा गरेका छन् ।
आयरल्याण्ड, जर्मनी, फ्रान्स, इटाली, नेदरल्याण्ड्स र बेल्जियमले बेलायत जाने हवाई उडान रोकेका छन् । हालका लागि यात्रा प्रतिबन्ध छोटो अवधिका लागि लगाइएको छ र मुलुक अनुसार नियमहरु पनि फरक फरक रहेका छन् । युरोपेली संघको आजै बस्ने बैठकले यस विषयमा थप छलफल गर्ने र आवश्यक निर्णय लिने बताइएको छ ।
बेलायतमा देखिएको नयाँ प्रकारको भाइरस छिटै लण्डन र दक्षिण पूर्वी इङल्याण्डमा फैलिरहेको छ । बेलायती प्रधानमन्त्री बोरिस जोनसनले शनिबार नै प्रभावित क्षेत्रमा चार तहको प्रतिबन्धात्मक व्यवस्थाको घोषणा गर्नुका साथै अन्य क्षेत्रमा क्रिसमसका लागि खुकुलो नीति अवलम्बन गरिएको बताउनु भयो । उच्च स्वास्थ्य अधिकारीहरुले नयाँ प्रकारको भाइरस थप खतरनाक भएको कुनै प्रमाण नभेटिएको बताएका छन्
