१२ माघ, काठमाडौं । चौथो संस्करणको प्रधानमन्त्री (पीएम) कप पुरुष क्रिकेट प्रतियोगितामा नेपाल पुलिस क्लब सेमिफाइनलमा प्रवेश गरेको छ ।
आज मुलपानी मैदानमा भएको समहू बी अन्तर्गतको अन्तिम खेलमा पुलिसले प्रदेश २ लाई ४ विकेटले पराजित गर्दै समूह उपविजेताको रुपमा अन्तिम चारमा स्थान बनाएको छ । समूह बी मा ४ खेल खेलेको पुलिसले ६ अंक जोड्यो भने प्रदेश २ समूहको चार वटै खेल हार्दै बाहिरिएको छ ।
आजको खेलमा प्रदेश २ ले पुलिसलाई १७० रनको लक्ष्य दिएको थियो भने त्यसको जवाफमा पुलिसले ३८ ओभर खेल्दै ६ विकेट गुमाएर लक्ष्य पूरा गरेको थियो।
पुलिसका लागि अनिल शाहले ४७ रन बनाए भने कुशल भुर्तेलले ४३ रनको योगदान गरे ।
कप्तान मन्जित श्रेष्ठ १२ रनमा अविजित रहे । यस्तै अमित श्रेष्ठ र दिपेन्द्र सिंह ऐरीले समान १७ रन बनाए । सुनिल धमला १३ रन बनाएर आउट भए ।
अब पुलिसले समूह ए को विजेतासंग सेमिफाइनलमा खेल्नेछ । समूह ए अन्तर्गत टीयू मैदानमा एपीएफ र आर्मीबीचको खेल भइरहेको छ । यो खेलको विजेता समूह विजेता बन्नेछ ।
