१८ बैशाख, रुपन्देही । रूपन्देहीमा कोरोना अस्थायी अस्पतालको आइसोलेसनमा रहेका एक जना कोरोना संक्रमितले आत्महत्या गरेका छन्।
रूपन्देहीको सैनामैना-१ स्थित पदमपाणि योग तथा चिकित्सालयमा संचालन गरिएको कोरोना अस्थायी अस्पतालमा रहेका सैनामैना रानिबगियाका ४० वर्षीय पुरूषले आत्महत्या गरेको प्रहरीले जनाएको छ।
ईलाका प्रहरी कार्यालय मुर्गियाका अनुसार ती पुरूषले अस्थायी अस्पतालकै शाैचालयमा घाँटीमा पासो लगाएर आत्महत्या गरेका हुन्।
वैशाख १६ गतेदेखि चिकित्सालयमा भर्ना भएका उनी शनिवार झुण्डिएको अवस्थामा फेला परेको प्रहरीको भनाइ छ।
सैनामैना नगरपालिकाका स्वास्थ्य शाखा प्रमुख हेमराज पन्थीले शुक्रबार दिनभरि अस्पतालले संचालन गरेको योग शिविर, प्रवचन लगायतमा सक्रिय सहभागी भएका उनी शनिबार बिहान पासो लगाएको अवस्थामा फेला परेको जानकारी दिनुभयो।
मृतकको शवलाई अहिले पोष्टमार्टमका लागि लुम्बिनी प्रादेशिक अस्पताल बुटवलमा राखिएको प्रहरीले जनाएको छ।
