काठमाडौँ, २० पुस । पर्यटक बस व्यवसायीहरुको छाता सङ्गठन टुरिष्ट बस एशोसियशन अफ नेपाल (टिवान)को ११ औँ वार्षिक साधारणसभा एवम् छैटौँ अधिवेशन आगामी शुक्रबार हुने भएको छ ।

एशोसियशनका अध्यक्ष ईश्वर शर्माको अध्यक्षतामा बसेको कार्यसमितिको बैठकले आगामी पुस २३ गते शुक्रबार वार्षिक साधारण सभा तथा अधिवेशन गर्ने निर्णय गरेको हो ।

साधारण सभामा कोरोना महामारीका समयमा पर्यटक बस व्यवसायीले भोग्नुपरेको समस्या र पर्यटक बसपार्क नहुँदा पर्यटकलाई परेको अफ्ठयारोको बारेमा गम्भीर समिक्षा हुने उपाध्यक्ष ढकनाथ काफ्लेले जानकारी दिनुभयो ।

एक दशक पहिले स्थापना भएको टुरिष्ट बस एशोसियशनअन्तर्गत हाल १०० भन्दा बढी पर्यटक बस व्यवसायीहरु आवद्ध छन् । दुई वर्षमा हुने अधिवेशनले आगामी कार्यकालका लागि नेतृत्वसमेत चयन गर्ने कार्यक्रम रहेको छ ।