सत्ता गठबन्धनको उच्चस्तरीय राजनीतिक समितिको बैठक बस्दै

काठमाडौं ,४ माघ। सत्ता गठबन्धनको उच्चस्तरीय राजनीतिक समन्वय समितिको बैठक आज बस्दैछ । स्थानिय तहको चुनावको मिति घोषणा गर्न सरकारमाथि दबाब बढिरहेको बेला सत्ता गठबन्धनको बैठक बस्न लागेको हो । बैठक मंगलबार बिहान ९ बजे प्रधानमन्त्री निवास बालुवाटारमा बस्ने तय भएको हो ।

कांग्रेस वरिष्ठ नेता रामचन्द्र पौडेलको संयोजकत्वमा रहेको समितिको आजको बैठकमा आगामी बैशाखमा स्थानीय तहको निर्वाचन गर्ने विषयमा छलफल हुनेछ । राष्ट्रियसभाको निर्वाचन यही माघ १२ गते हुँदैछ । आगामी जेठमा कार्यकाल सकिन लागेको स्थानिय तहको चुनाव बैशाखमै गराउन सरकारमाथि दबाब छ ।निर्वाचन आयोगले आगामी बैशाखमा स्थानीय तहको निर्वाचनका लागि मिति समेत प्रस्ताव गरिसकेको छ ।