२१ बैशाख, काठमाडौं । स्थानीय तहको निर्वाचनमा रसुवा जिल्लाको उत्तरगया गाउँपालिकाको अध्यक्ष र उपाध्यक्षमा उम्मेदवार दिनुभएका उपेन्द्र लम्साल (अध्यक्ष) सुनितामाया गुरुङ (उपाध्यक्ष)ले निर्वाचन प्रतिवद्धताहरु सार्वजनिक गर्नुभएको छ। लामो समयदेखि राजनीतिसँगै समाजसेवामा पनि लाग्दै आउनुभएको उहाँहरुले संयुक्तरुपमा आफ्ना प्रतिवद्धताहरु सार्वजनिक गर्नुभएको हो। उहाँहरु दुवैजनाले नेपाली कांग्रेसबाट आफ्नो उम्मेदवारी दिनुभएको छ।
उहाँहरुको प्रतिवद्धता पत्रमा गाउँपालिकाका स्वास्थ्य, शिक्षा, खानेपानी, कृषि तथा सिंचाई, यातायात, वस्ती विकासलगायतका विषयहरुलाई समेट्नुभएको छ।
जसअन्तर्गत गाउँपालिकाभित्र रहेका सामुदायिक विद्यालयहरुको शैक्षिक गुणस्तर वृद्धि गरिनुका साथै कक्षा १ देखि कक्षा १२सम्म नि:शुल्क शिक्षाको व्यवस्था गरिने पत्रमा उल्लेख गर्नुभएको छ।
गाउँपालिकाभित्र रहेका खोलाहरुमा आवश्यकताअनुरुप पक्कि पुलहरु बनाइने उहाँहरुले बताउनुभएको छ। त्यस्तै स्वास्थ्य क्षेत्रमा गाउँपालिकाभित्र १५ शैयाको आधुनिक अस्पतालको स्थापना गरी सर्वसुलव स्वास्थ्य सेवा प्रदान गरिने प्रतिबद्धता पत्रमा उल्लेख छ।
त्यस्तै पर्यटन क्षेत्रको प्रवर्धनका लागि स्थानीय भेषभुषा र संस्कृतिलाई संरक्षण गरी होमस्टे संचालनमा ल्याइने उहाँहरुले प्रतिवद्धता गर्नुभयो।
