एजेन्सी । दक्षिण भारतीय अभिनेता अल्लु अर्जुनको फिल्म ‘पुष्पा २’ (पुष्पा द रुल) को टिजर सार्वजनिक भएको छ ।
निर्देशक सुकुमारद्वारा निर्देशित यस फिल्मको सार्वजनिक टिजरमा ‘पुष्पा’लाई तिरुपति जेलबाट फरार देखाइएको छ । जसको खोजीमा प्रहरी जुटेको छ र शहरमा दंगाजस्तो अवस्था सिर्जना भएको छ ।
सार्वजनिक टिजरमा निर्माण टिमले यो यात्रा अझै अन्त्य नहुने स्पष्ट पारेका छन् । फिल्मको दोस्रो टिजर केही दिनमा सार्वजनिक गर्ने निर्माण टिमले जनाएको छ । फिल्मकी अभिनेत्री रश्मिका मन्डन्नाको जन्मदिनको अवसर पारेर निर्माताले पहिलो टिजर सार्वजनिक गरेका हुन् । त्यस्तै, फिलमको दोस्रो टिजर अल्लुको जन्मदिनमा सार्वजनिक गरिने भारतीय सञ्चार माध्यमले जनाएका छन् ।
‘पुष्पा २’ सन् २०२३ मा रिलिज हुने बताइएको छ । फिल्मको बजेट करिब ४ सय ५० करोड भारतीय रुपैयाँ रहेको छ । ‘पुष्पा द राइज’ डिसेम्बर २०२१ मा रिलिज भएको थियो। जुन बक्स अफिसमा ब्लकबस्टर साबित भयो । फिल्मले विश्वभर ३ सय ५० करोड भारतीय रुपैयाँको कलेक्सन गरेको थियो ।
यस फिल्ममा अल्लु अर्जुन रश्मिका मन्डन्ना र फहद फासिल पनि मुख्य भूमिकामा देखिने छन् ।
