विराटनगर । राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनले कोशी प्रदेश सरकार गठन प्रक्रियामा राप्रपा तठस्थ बस्ने बताउनुभएको छ । मंगलबार विराटनगर विमानस्थलमा पत्रकारहरुसँग कुरा गर्दै उहाँले आफूले बारम्बार नेपाली कांग्रेस र नेकपा (एमाले) लाई मिलेर सरकार बनाउन अग्रह गरिरहेको बताउनुभयो ।

उहाँले राप्रपा तत्काल सरकारमा समावेश नहुने स्पष्ट पार्दै भन्नुभयो, “हामी अहिले तथस्ट बस्छौँ।” अध्यक्ष लिङ्देनले कोशी प्रदेशमा संविधानअनुसार अझै सरकार गठनका थुप्रै धाराहरू प्रयोग गर्न बाँकी रहेका कारण राप्रपा निर्णायक हुने अवस्था आएमा मात्रै पार्टीमा छलफल गरेर आवश्यक निर्णय लिइने बताउनुभयो ।

उहाँका अनुसार संविधानको धारा १६८ को उपधारा २ अनुसार सरकार गठनको तयारी भइरहेको र अझै धरा १६८को उपधारा ३ र ५ को अभ्यास हुन बाँकी नै छ। “सरकार निर्माणको अन्तिम विकल्प धारा १६८ को उपधारा ५ मा पुगेपछि मात्रै राप्रपाले कसलाई सघाउने कसरी सत्तामा साझेदारी गर्ने भन्ने निर्णय गर्छ”, उहाँले भन्नुभयो, “अहिले हामी तथस्ट बस्छौँ।”

कोशी प्रदेशमा कांग्रेसका संसदीय दलका नेता उद्धव थापाको नेतृत्वमा सरकार गठन गर्ने सत्तारुढ दलहरूले तयारी गरिरहेका छन्। थापाले सभामुख बाबुराम गौतमलाई राजीनामा गराएर बहुमत जुटाउने तयारी गर्नुभएको छ । ९३ सदस्य रहेको कोशी प्रदेशमा सत्तारुढ गठबन्धनमा सभामुखसहित ४७ मत रहेको छ। कांग्रेसका २९, माओवादीका सभामुखसहित १३, जसपाका १ र नेकपा (एकीकृत समाजवादी) का ४ जना सांसद छन्। एमाले नेतृत्वको गठबन्धनमा एमालेका ४० र राप्रपाका ६ गरी ४६ जना सांसद छन्।