काठमाडौं । काठमाडौँ महानगरपालिका–२६ का वडाअध्यक्ष ख्यामराज तिवारीले ठमेल र दरबारमार्गको सुरक्षा स्थितीलाई हेरेर नयाँबसपार्क क्षेत्रलाई पनि २४ सै घण्टा खुलाइने बताउनुभएको छ ।
मित्रनगर विकास तथा सुधार समिति आज नयाँबसपार्कमा आयोजना गरेको ‘नयाँ वर्ष २०८१ को शुभकामना आदानप्रदान तथा चियापान कार्यक्रम’मा बोल्दै ठमेल र दरबारमार्गको सुरक्षा स्थितीलाई हेरेर नयाँ बसपार्कलाई समेत २४ सै घण्टा खुलाउने बताउनुभएको हो ।
“देशभरका मानिस आवतजावत गर्ने ठाउँ नयाँ बसपार्कलाई पनि २४ सै घण्टा सञ्चालन गर्नु जरुरी छ, वैशाख १ गतेदेखि ठमेल र दरबारमार्ग खुला गर्न लागिएको छ, त्यहाँको स्थितीलाई हेरेर नयाँबसपार्क पनि सञ्चालन गछौँ, जसले यस क्षेत्रको अर्थतन्त्र चलायमान हुन्छ,”– उहाँले भन्नुभयो । उहाँले बजार २४ सै घण्टा खुलाउँदा स्थानीयबासीलाई असर पर्न नहुने उल्लेख गर्नुभयो ।
वडाअध्यक्ष तिवारीले अबको दुई महिनाभित्र नयाँ बसपार्क आसपासका सडकहरु कालोपत्रे भईसक्ने उल्लेख गर्नुभयो । काठमाडौँ महानगरपालिकाको वडा नं २६ मा ठमेलसहित नयाँ बसपार्कसमेत पर्दछ ।
नेपाल यातायात व्यवसायी राष्ट्रिय महासङ्घका वरिष्ठ उपाध्यक्ष सरोज सिटौलाले ठमेल र नयाँ बसपार्कलाई एकआपसमा जोड्न सकेमात्र नयाँबसपार्क क्षेत्रको अर्थतन्त्र चलायमान हुने बताउनुभयो । “रातको समयमा समेत नयाँबसपार्कमा सवारीसाधन ओहोरदोहोर गर्ने भएकाले यस क्षेत्रको बजार २४ घण्टा खोल्नु जरुरी छ,”– उहाँले भन्नुभयो ।
मित्रनगर विकास तथा सुधार समितिका अध्यक्ष गङ्गा पन्तले नयाँबसपार्क क्षेत्रलाई सुन्दर र व्यवस्थित बनाउनका लागि समितिले काम गरिरहेको उल्लेख गर्नुभयो । उहाँले नयाँबसपार्क क्षेत्रको विकृति विसङ्गती अन्त्यका लागि स्थानीय टोलबासी, तीनै तहका सरकार र प्रहरीबीच सहकार्य आवश्यक रहेको उल्लेख गर्नुभयो । उक्त समितिले विगत वर्षमा ‘प्रथम नयाँबसपार्क सडक महोत्सव’समेत आयोजना गरेको थियो ।
