काठमाडौं ।बरिष्ठ चलचित्रकर्मी चेतन कार्कीको स्मृतिमा स्थापित चेतन कार्की स्मृति पुरस्कार–०८०, निर्देशक आकाश अधिकारीलाई प्रदान गरिने भएको छ ।
दुई दशकभन्दा लामो समयदेखि नेपाली चलचित्रको संरक्षण तथा श्रीबृद्धिमा बिभिन्न बिधाबाट अनवरत योगदान गरिरहेका निर्देशक तथा अभिनेता अधिकारीलाई नगद १५ हजार पुरस्कार राशीसहितको सो पुरस्कार प्रदान गर्न लागिएको बताइएको छ ।
परिवर्तन नेपालका अध्यक्ष मोहन निरौला, डिजाइनर सुन्दर श्रेष्ठ र बरिष्ठ सिने पत्रकार शान्तिप्रिय सम्मिलित पुरस्कार निर्णायक समितिबाट पुरस्कार विजेताहरुको निर्णय गरिएको हो ।
यो पुरस्कार गत बर्ष अभिनेता, निर्देशक देशभक्त खनाललाई प्रदान गरिएको थियो ।
साथमा यस वर्ष स्व. अभिनेत्री–मोडल निशा घिमिरेको स्मृतिमा स्थापित निशा स्मृति पुरस्कार, निशा स्मृति प्रतिभा पुरस्कार र निशा स्मृति पत्रकारिता पुरस्कार–०८० पनि प्रदान गरिने निर्णय भएको परिवर्तन नेपालले जानकारी गराएको छ ।
परिवर्तन नेपालबाट प्रेषित बिज्ञप्ती अनुसार अभिनेत्री–मोडल अनु शाह, बबिता ढकाल (रोजा) र चलचित्र पत्रकार–गीतकार गीता अधिकारी नगद राशीसहितका बिभिन्न पुरस्कारबाट पुरस्कृत हुने भएको छ ।
निशा संरक्षण कोषका अध्यक्ष दुर्गानाथ दाहालको अध्यक्षतामा बसेको कोषको बैठकले यी पुरस्कारहरूकाे निर्णय गरेकाे हाे ।
विगत दुई दशकदेखि अनुको र विगत डेढ दशकदेखि बबिताको मोडलिङ र अभिनय क्षेत्रमा अनवरत सक्रिय योगदानको कदर स्वरुप २०–२० हजार नगद राशीको निशा स्मृति पुरस्कार र निशा प्रतिभा पुरस्कार दिन लागिएको जनाइएको छ ।
त्यस्तै विगत दुई दशकदेखि अनवरत कला पत्रकारितामा सक्रिय पत्रकार गीतालाई नगद १० हजार राशीको निशा स्मृति पत्रकारिता पुरस्कार प्रदान गर्ने निर्णय गरेको बताइएको छ ।
पुरस्कार १३ बैशाखमा राजधानीमा एक समारोहका बीच प्रदान गरिने भएको छ ।