काठमाडौं- विन्ध्यवासिनी म्यूजिक अवार्ड २०८२ का अवसरमा संगीतरत्न शम्भूजीत बासकोटालाई लाइफटाइम अचिभमेन्ट अवार्ड प्रदान गरिएको छ ।
नेपाली गीत संगीतका विख्यात व्यक्तित्व संगीतरत्न बासकोटालाई नगद रु १ लाख १ रुपैयाँसहित सम्मानपत्र, ट्रफी, दोसल्ला र मालाद्वारा लाइफटाइभ अचिभमेन्ट अवार्ड प्रदान गरिएको हो ।
शनिबार सम्पन्न १६औं विन्ध्यवासिनी म्यूजिक अवार्डको अवसरमा गायक शिव परियार र गायिका समीक्षा अधिकारी सर्वोत्कृष्ट आधुनिक गायक गायिका घोषित भए । उनीहरुलाई नगद रु. ५ हजारसहित ट्रफी प्रदान गरिएको थियो ।
कला पत्रकारिता सम्मानबाट पत्रकार पवन आचार्यलाई २५ हजार नगदसहित सम्मान अर्पण गरियो । प्रेमध्वज संगीतरत्न सम्मानबाट नगद २५ हजारसहित गायिका रचना रिमाललाई सम्मान अर्पण गरिएको थियो ।
त्यसैगरी गीतकार विजय शिवाकोटीलाई नगद ५० हजार राशिसहित विन्ध्यवासिनी संगीत साधना सम्मान अर्पण गरिएको थियो । त्यस्तै लोकप्रिय गायक पशुपति शर्मालाई नगद २५ हजारसहित झलकमान लोक संगीत सम्मान अर्पण गरिएको थियो ।
सर्वोत्कृष्ट लोकदोहोरी तर्फ गायिका ज्योति मगर र अर्जुन सापकोटाले पुरस्कार प्राप्त गरे ।
सर्वोत्कृष्ट शब्द रचनाको अवार्ड भूपेन्द्र बुढाथोकी तथा सर्वोत्कृष्ट संगीत रचनाको अवार्ड मिर्मिरेमा बासेको भाले गीतबाट शिव हमालले चुम्न सफल भए ।
त्यस्तै दिपक विष्टले सर्वोत्कृष्ट भिडियो सम्पादनको अवार्ड प्राप्त गरे भने बुद्ध थापाले ए आमा जाम भन्यो मलाई गीतबाट सर्वोत्कृष्ट छायाँकारको अवार्ड चुम्न सफल भए । सर्वोत्कृष्ट म्यूजिक भिडियो मोडलको अवार्ड गीता ढुंगाना र प्रभातपाल ठकुरीले कता हिन्यौ साइला गीतबाट चुम्न सफल भए । त्यस्तै रितु बोहराले पैसा जोगाउन गीतबाट सर्वोत्कृष्ट नवगायनको अवार्ड चुम्न सफल भएकी थिइन् ।
कार्यक्रमलाई स्वागत गर्दै अवार्डकी अध्यक्ष लीना शर्मा रेग्मीले स्रष्टा कलाकारहरुको सम्मानमा विन्ध्यवासिनी अवार्ड सदैव क्रियाशील र कर्तव्यबोधका साथ लागिपरेको बताएकी थिइन् ।
कार्यक्रममा समीक्षा अधिकारी, सुमन कुमार श्रेष्ठ, अजर जंगम, पशुपति शर्मा, रचना रिमालले गीत प्रस्तुत गरेका थिए भने गुरुआमा फिल्म्सको तर्फबाट गीता ढुंगाना, बबिन सिंह ठकुरी, कविता न्यौपाने, एलिना रायमाझीले नृत्य प्रस्तुत गरेका थिए ।
