काठमाडौँ – नक्कली भुटानी शरणार्थी प्रकरणमा पूर्वउपप्रधानमन्त्री टोपबहादुर रायमाझी र पूर्वगृहमन्त्री बालकृष्ण खाँडसहित १४ जना दोषी ठहरिएका छन् । सात जनाले सफाइ पाएका छन् । फरारको हकमा कानून बमोजिम मुद्दा मुल्तबीमा राखिएको छ ।
काठमाडौँ जिल्ला अदालतले मंगलबार उनीहरूलाई दोषी ठहर गरेको हो । न्यायाधीश तेजबहादुर खड्काको इजलासले उक्त मुद्दामा कसूर ठहर गर्दै सजाय निर्धारणका लागि पेस गर्न आदेश दिएको हो । उनीहरूले संगठित रुपमा ठगी गरी उक्त कसूरबाट राज्यविरुद्धको अपराध गरेको अदालतको आदेशमा उल्लेख छ ।
दोषी ठहर हुनेहरूमा एमालेका नेता रायमाझी र कांग्रेस नेता खाँडसहित इन्द्रजीत राई, टेकनारायण पाण्डे, टेकनाथ रिजाल केशव दुलाल, सानु भण्डरी, सागर राई, सन्देश शर्मा, गोविन्दकुमार चौधरी, आङटावा शेर्पा, नरेन्द्र केसी, शमशेर मियाँ, हरिभक्त महर्जन र निरन्जकुमार खरेल रहेका छन् ।
त्यसैगरी एकीकृत कसूरतर्फ खाण, रिजाल, केसी, मियाँ, महर्जन र निरन्जकुमार खरेलले राज्यविरुद्धको कसूरमा मतियारका रुपमा अपराध गरेको आदेशमा उल्लेख छ ।
मुद्दामा ७ जनाले सफाइ पाएका छन् । रामशरण केसी, टंककुमार गुरुङ, सन्दीप रायमाझी, प्रतिक थापा, लक्ष्मी महर्जन, केशव तुलाधर र आषिश बुढाथोकीले पाए सफाइ पाएका हुन् । फरार रहेका अभियुक्तका हकमा पक्राउ परेका बखत कानुन बमोजिम हुने गरी मुद्दा मुल्तबीमा राखिएको छ ।
अशोक पोखरेल, धिरेन राई, दीपा हुमागाईं, निरज राई, राजेश अर्याल, मोहनराज राई, विनिता सावदेन लिम्बू र सुनील बुढाथोकी फरार छन् । उनीहरू पक्राउ परेपछि कानून अनुसार हुने गरी मुद्दा मुल्तबीमा राखिएको छ ।
