संस्थापन इतर समूहको राष्ट्रिय भेला मूल आयोजक समितिका संयोजक डा. शशांक कोइरालाले मंगलबार निर्वाचन आयोग र कांग्रेस केन्द्रीय कार्यालयलाई छुट्टाछुट्टै पत्र पठाउँदै पार्टीका सांगठनिक तथा नीतिगत गतिविधि तत्काल स्थगित गर्न आग्रह गर्नुभएको हो ।
कांग्रेस नेता दीपक खड्काका अनुसार सर्वोच्च अदालतले कांग्रेसको आधिकारिकता विवादसम्बन्धी मुद्दा पुनरावलोकनका लागि अनुमति दिएपछि त्यसलाई आधार बनाएर महाधिवेशनसम्बन्धी प्रक्रिया रोक्न पत्राचार गरिएको हो ।
इतर समूहले आगामी १५औँ महाधिवेशन वा विशेष महाधिवेशनसँग सम्बन्धित कुनै पनि सांगठनिक, प्राविधिक तथा नीतिगत कार्यतालिका अघि नबढाउन माग गरेको छ । अदालतबाट मुद्दाको अन्तिम टुंगो नलाग्दासम्म पार्टीबाट हुने दीर्घकालीन प्रभाव पार्ने राजनीतिक, सांगठनिक, नीतिगत तथा आर्थिक निर्णयसमेत यथास्थितिमा राख्नुपर्ने उसको माग छ ।
त्यस्तै, सर्वोच्चको पूर्ण इजलासबाट अन्तिम फैसला नआएसम्म कांग्रेसका सम्पूर्ण सांगठनिक संरचनालाई साविककै अवस्थामा कायम राख्न र न्यायिक प्रक्रियाको सम्मान गर्न पनि इतर समूहले आग्रह गरेको छ ।
सर्वोच्च अदालतले २१ साउनमा नेपाली कांग्रेसको आधिकारिकतासम्बन्धी विवादमा पुनरावलोकनका लागि अनुमति दिएको थियो । सर्वोच्चको उक्त निर्णयसँगै कांग्रेसको विशेष महाधिवेशनसम्बन्धी विवाद पुनः सुनुवाइको प्रक्रियामा प्रवेश गरेको छ ।
इतर समूहले यही कानुनी प्रक्रियालाई आधार बनाएर अदालतको अन्तिम निर्णयअघि पार्टीको महाधिवेशनसम्बन्धी कुनै पनि महत्वपूर्ण प्रक्रिया अघि नबढाउन दबाब दिएको हो ।
