काठमाडौं – नेपाल उद्योग वाणिज्य महासंघका अध्यक्ष अञ्जन श्रेष्ठले ऐन–नियम तर्जुमा गर्दा निजी क्षेत्रलाई केवल ‘साक्षी’का रूपमा नभई अर्थपूर्ण सहभागिता सुनिश्चित गर्न सरकारसँग माग गर्नुभएको छ ।
शुक्रवार नेपाल एशोसिएशन अफ टुर एण्ड ट्राभल एजेन्ट्स (नाट्टा) को ५९औँ वार्षिक साधारण सभालाई सम्बोधन गर्दै अध्यक्ष श्रेष्ठले नीतिगत सुधार, पर्यटन पूर्वाधार र हवाई कनेक्टिभिटीका विषयमा सरकारको ध्यानाकर्षण गराउनुभएको हो ।
उहाँले पर्यटन ऐन, कम्पनी ऐनलगायत महत्वपूर्ण कानून निर्माणका क्रममा निजी क्षेत्रलाई पर्याप्त समय नदिई हतारमा सुझाव माग्ने गरिएको भन्दै असन्तुष्टि व्यक्त गर्नुभयो । कुनै पनि ऐन ल्याउनुअघि कम्तीमा एक महिनाको समय दिएर देशव्यापी रूपमा छलफल गर्ने वातावरण बनाउन उहाँले सरकारलाई आग्रह गर्नुभयो ।
‘मन्त्रालयहरूले एक हप्ताभित्र सुझाव दिन दबाब दिने गरेका छन्, जसले गर्दा विस्तृत छलफल हुन पाउँदैन,’ अध्यक्ष श्रेष्ठले भन्नुभयो, ‘देशको अर्थतन्त्रमा ८१ प्रतिशत योगदान पु¥याउने निजी क्षेत्रको आवाजलाई औपचारिकतामा मात्र सीमित राख्नु गलत हो।’
पर्यटन क्षेत्रलाई विदेशी मुद्रा आर्जनको महत्वपूर्ण आधार मानिए पनि यसबाट हुने वास्तविक लाभ र स्थानीय उत्पादनको योगदानबारे गम्भीर समीक्षा आवश्यक रहेको उहाँले बताउनुभयो । १० लाख पर्यटक भित्र्याउने मानसिकताबाट माथि उठेर वार्षिक २० लाखभन्दा बढी पर्यटक नेपाल भित्र्याउन पूर्वाधार र हवाई कनेक्टिभिटीमा विशेष ध्यान दिनुपर्ने उहाँको भनाइ थियो ।
राष्ट्रिय ध्वजावाहक नेपाल वायुसेवा निगमको सुधारका लागि रणनीतिक साझेदार भित्र्याउन वा निजी क्षेत्रसँग सहकार्य गरेर अघि बढ्नुपर्ने सुझाव पनि अध्यक्ष श्रेष्ठले दिनुभयो । अन्तर्राष्ट्रिय विमानस्थलहरूको व्यावसायिक सञ्चालनमा सरकारसँग सहकार्य गर्न निजी क्षेत्र तयार रहेको उहाँले बताउनुभयो ।
पोखरा र भैरहवा अन्तर्राष्ट्रिय विमानस्थलको प्रसङ्गमा उहाँले पूर्वाधार निर्माण हुनुअघि नै बजार प्रवद्र्धन र अन्तर्राष्ट्रिय मार्केटिङ सुरु गर्नुपर्नेमा राज्य चुकेको टिप्पणी गर्नुभयो । ‘पूर्वाधार बनिसकेपछि मात्र बजार खोज्ने परिपाटीले समस्या ल्याएको छ,’ उहाँले भन्नुभयो ।
हवाई सेवामा लगाइएको मूल्य अभिवृद्धि कर (भ्याट) का कारण पर्यटन क्षेत्रमा समस्या परेको उल्लेख गर्दै उहाँले औद्योगिक व्यवसाय ऐनले दिएका सुविधासमेत प्रभावकारी रूपमा कार्यान्वयन हुन नसक्नु दुःखद् भएको बताउनुभयो । बजेटमा घोषणा गरिएका विद्युत् महसुल छुटलगायतका सुविधा कार्यान्वयन नहुँदा सरकार र राज्यका निकायप्रतिको विश्वसनीयता घट्दै गएको उहाँको भनाइ थियो ।
अध्यक्ष श्रेष्ठले पर्यटन प्रवद्र्धनमा डिजिटल प्रविधिको प्रयोगलाई प्राथमिकता दिनुपर्नेमा पनि जोड दिनुभयो । अबको युग डिजिटल प्रविधिको भएकाले नेपाललाई अन्तर्राष्ट्रिय पर्यटन बजारमा स्थापित गर्न आर्टिफिसियल इन्टेलिजेन्स (एआई) र डिजिटल मार्केटिङको प्रभावकारी प्रयोग आवश्यक रहेको उहाँले बताउनुभयो ।
निजी क्षेत्रसँग पर्याप्त छलफल र सहकार्य गरेर नीति तथा कानून निर्माण गर्न सके मात्र पर्यटनसहित समग्र अर्थतन्त्रको दिगो विकास सम्भव हुने उहाँको भनाइ थियो ।
