काठमाडौँ– राष्ट्रपति रामचन्द्र पौडेलले संविधान कागजमा लेखिएका शब्दहरूको सङ्ग्रह मात्र नभई नागरिकका सपना, आशा, अपेक्षा र अधिकारको साझा प्रतिज्ञा भएको बताउनुभएको छ ।
संविधान दिवसका अवसरमा शीतल निवासमा शनिवार आयोजित चियापान कार्यक्रममा बोल्दै उहाँले यस्तो बताउनुभएको हो ।
राष्ट्रपति पौडेलले विपत्तिले विकासको अर्थ सडक, पुल र भवन निर्माणमा मात्र सीमित नभएको स्मरण गराएको बताउनु भयो । उहाँले मानिसको जीवन, जीविका र भविष्यको सुरक्षा पनि विकासको महत्त्वपूर्ण पक्ष भएको उल्लेख गर्नुभयो ।
उहाँले विपत्तिपछिको पुनर्निर्माण गर्दा भत्किएका संरचनासँगै विस्थापित परिवारका सपना पनि पुनः स्थापित गर्नुपर्नेमा जोड दिनुभयो । जलवायु परिवर्तनका चुनौतीबिच नेपालको विकासको ढाँचा अझ मानवीय, न्यायपूर्ण र प्रकृतिमैत्री बनाउनुपर्ने उहाँको भनाइ छ ।
राष्ट्रपति पौडेलले संविधानले लोकतन्त्र, सङ्घीयता र बहुल वादमा आधारित समावेशी नेपाल निर्माणको अवसर प्रदान गरेको बताउनु भयो । एकात्मक र केन्द्रीकृत शासन प्रणालीको स्थानमा सङ्घीयता प्राप्त हुनु संविधानको महत्त्वपूर्ण उपलब्धि भएको उल्लेख गर्दै उहाँले सङ्घीयतालाई देश विकासको अनिवार्य तहका रूपमा अघि बढाउनुपर्ने बताउनु भयो ।
उहाँका अनुसार संविधानले राज्यको शासकीय संरचनालाई नयाँ ढङ्गले स्थापित गर्दै नागरिकलाई इतिहासमै सबैभन्दा धेरै स्वतन्त्रता र सम्मान प्राप्त गर्ने आधार दिएको छ ।
पौडेलले भन्नुभयो, ‘विपत्तिले हामीलाई सम्झाएको छ । विकास केवल सडक, पुल र भवन निर्माण होइन, मानिसको जीवन, जीविका र भविष्यको सुरक्षा पनि हो । त्यसैले पुनर्निर्माण गर्दा भत्किएका संरचनासँगै विस्थापित परिवारका सपना पनि पुनर्स्थापित गर्नुपर्छ ।
हाम्रो संविधानले लोकतन्त्र, सङ्घीयता, बहुल वाद र समावेशितामार्फत नागरिकका अधिकार, आशा र आकाङ्क्षालाई संस्थागत गरेको छ । एकात्मक र केन्द्रीकृत शासन प्रणालीको विकल्पका रूपमा प्राप्त सङ्घीयतालाई देश विकासको महत्त्वपूर्ण आधारका रूपमा उपयोग गर्न आवश्यक छ । जलवायु परिवर्तनका चुनौतीबिच हाम्रो विकासको ढाँचा अझ मानवीय, न्यायपूर्ण र प्रकृतिमैत्री हुनुपर्छ ।
संविधान कागजमा लेखिएका शब्दहरूको सङ्ग्रह मात्र होइन; यो नागरिकका सपना, आशा, अपेक्षा र अधिकारको साझा प्रतिज्ञा हो । यिनै उपलब्धिको जगमा सुखद र समृद्ध भविष्य निर्माण गर्नुपर्छ ।’
उहाँले संविधानले दिएका उपलब्धिका आधारमा देशको भविष्यको सुखद यात्रा सुनिश्चित गर्न सकिने विश्वाससमेत व्यक्त गर्नुभयो । –न्युज एजेन्सी नेपाल
