चेन्नई सुपर किङ्सले इन्डियन प्रिमियर लिग- आईपीएल टी-ट्वान्टी क्रिकेटमा विजयी सुरुवात गरेको छ ।
हिजोदेखि शुरू भएको आईपीएलको उद्घाटन खेलमा साविकको उपविजेता चेन्नईले साविक विजेता मुम्बई इन्डियन्सलाई ५ विकेटले पराजित गर्यो।
टस हारेर पहिले ब्याटिङको निम्तो पाएको मुम्बईले चेन्नईसमक्ष १ सय ६३ रनको लक्ष्य प्रस्तुत गरेकोमा चेन्नईले सो लक्ष्य १९ ओभर दुई बलमा ५ विकेट गुमाएर पूरा गर्न सफल भयो। गत वर्षको फाइनलमा मुम्बईसँग मात्र १ रनले पराजित भएपछि चेन्नई उपाधि जित्नबाट चुकेको थियो।
यसैबीच आज दिल्ली क्यापिटल्स र किङ्ग्स इलेभन पञ्जाबबीच प्रतिस्पर्धा हुँदैछ। शेख जाएद रंगशालामा हुने उक्त खेल नेपाली समयानुसार साँझ ७ बजेर ४५ मिनेटमा शुरू हुनेछ।
तेह्रौँ संस्करणको आईपीएलअन्तर्गत कुल आठ क्लबहरू प्रतिस्पर्धा गर्दैछन्। १० नोभेम्बर सम्म चल्ने आईपीएल यसअघि २९ मार्चमा भारतमै शुरू हुने तय भएको थियो। तर कोरोनाभाइरस महामारीका कारण पूर्वनिर्धारित तालिका रद्द गरी यूएईमा गर्ने निर्णय गरिएको थियो।
