पटना। भारतको बिहारमा सम्पन्न विधानसभाको निर्वाचनमा भारतीय जनता पार्टी र मुख्यमन्त्री नितिश कुमारको जनता दल युनाइटेड (जेडियू) को नेसनल डेमोक्रेटिक अलायन्स (एनडिए) लाई झिनो बहुमत प्राप्त भएको छ ।
बिहार विधासभामा कूल २४३ सिट छ । यसमध्ये एनडिएलाई १२५ स्थान प्राप्त भएको छ । सरकार गठनका लागि १२२ स्थान आवश्यक हुन्छ ।
एनडिएको मुख्य दल भाजपाले यसपटक बिहारमा निकै राम्रो प्रदर्शन गरेको छ । भाजपाले ७४ स्थान जितेको छ भने नितिशको जेडियूले तेस्रो ठूलो दलका रुपमा ४३ स्थान जितेको छ ।
विधान सभाको निर्वाचनमा सबैभन्दा बढी स्थान लालू प्रसाद यादवका छोरा तेजस्वी यादवको राष्ट्रिय जनता दल (आरजेडी) ले जितेको छ । यस दलले ७५ स्थान जितेर सबैभन्दा ठूलो दल बनेको छ ।
तर महागठबन्धनका अन्य सहयोगी दलले राम्रो प्रदर्शन गर्न नसक्दा यस गठबन्धनले ११० स्थानमा चित्त बुझाउनु परेको छ । महागठबन्धनमा सहभागी भारतीय राष्ट्रिय काँग्रेसले १९ स्थान जितेको छ ।
एनडिएका तर्फबाट वर्तमान मुख्यमन्त्री नितिश कुमारलाई नै आगामी मुख्यमन्त्री पदका लागि अघि सारिएकाले नितिश नै मुख्यमन्त्री हुने सम्भावना छ । भाजपाभन्दा निकै कम सिट ल्याएकाले आगामी दिनमा यो गठबन्धनमा पनि समस्या आउने सम्भावना बढी छ ।
नितिश लगातार १५ वर्षदेखि बिहारको मुख्यमन्त्री हुनु भएको छ । अब फेरि उहाँ मुख्यमन्त्री नियुक्त भए यो आफैंमा एउटा रेकर्ड बन्नेछ ।
यस चुनवामा तीन हजार ७५५ उम्मेदवार रहेका थिए । बिहारमा गत अक्टोबर २८, नोभेम्बर ३ र नोभेम्बर ७ मा गरी तीन चरणमा चुनाव भएको थियो ।
