काठमाडौँ – बैंकिङ क्षेत्रको समग्र सुधार र सुदृढीकरणका लागि सुझाव पेस गर्न डा. रेवतबहादुर कार्की संयोजकको संयोजकत्वमा तीन सदस्यीय कार्यदल गठन गरिएको छ ।
कार्यदलको सदस्यमा भुवनकुमार दहाल र सदस्य सचिवमा नेपाल राष्ट्र बैंकको बैंक तथा वित्तीय संस्था नियमन विभागका कार्यकारी निर्देशक गुरुप्रसाद पौडेल रहेका छन् ।
उक्त कार्यदलको समयावधि एक महिनाको रहने गरी छ बुँदै जिम्मेवारी तोकिएको छ ।
कार्यदललाई बैंकिङ नीति नियमनलाई उदार तर विवेकशील (प्रुडेन्सियल), जोखिममा आधारित प्रभावकारी सुपरीवेक्षण र ग्राहकमैत्री बैंकिङ सेवाको विकासका सम्बन्धमा अध्ययन गरी सुझाव पेस गर्नुपर्ने जिम्मेवारी तोकिएको छ ।
यसैगरी आर्थिक गतिविधि पूर्ण चलायमान बनाउन बैंकिङ क्षेत्रले खेल्नुपर्ने भूमिका, ग्रामीण क्षेत्रमा कर्जा प्रवाहलाई प्रभावकारी बनाउन चाल्नुपर्ने कदम र बैंक तथा वित्तीय संस्था गाभ्ने र प्राप्ति तथा उक्त कार्यपछिका समस्याहरूको पहिचान तथा समाधानको सुझावका सम्बन्धमा अध्ययन गरी सुझाव पेस गर्न कार्यदललाई जिम्मेवारी दिइएको राष्ट्र बैंकले जनाएको छ ।
नेपाललाई ग्रे लिष्टबाट हटाउन बैकिङ क्षेत्रले खेल्नुपर्ने भूमिका र पुँजीबजार विकासमा केन्द्रीय बैंकको समन्वयात्मक भूमिकााबरे पनि उनीहरूलाई अध्ययन गर्न जिम्मेवारी दिइएको छ ।
