काठमाडौँ – सरकारले प्रधानमन्त्री बालेन्द्र साहले संसदमा नेपालले भारतको भूमि अतिक्रमण गरेको भन्ने आशय व्यक्त गरेको भन्ने दाबीलाई अस्वीकार गरेको छ।
मंगलबार सिंहदरबारमा सञ्चारकर्मीसँग कुरा गर्दै सरकारका प्रवक्ता तथा शिक्षा, विज्ञान तथा खेलकुदमन्त्री सस्मित पोखरेलले प्रधानमन्त्रीको अभिव्यक्तिलाई गलत ढंगले व्याख्या गरिएको स्पष्ट पारे। उनका अनुसार सीमा विवादसम्बन्धी छलफलका क्रममा प्रधानमन्त्रीले नेपाल–भारतबीचको संयुक्त संयन्त्रमा उठेका विभिन्न विषयहरूको सन्दर्भ मात्र उल्लेख गरेका थिए।
प्रवक्ता पोखरेलले प्रधानमन्त्रीले नेपालले भारतको भूमि मिचेको भनेर कुनै दाबी नगरेको र सदनमा त्यस प्रकारको अर्थ लाग्ने अभिव्यक्ति नदिएको बताए। उनले सीमा सम्बन्धी विषय उठ्दा आफूलाई आश्चर्य लागेको प्रसंग मात्रै सदनमा राखिएको पनि स्पष्ट पारे।
उनले नेपाल–भारतबीच विद्यमान सीमा विवादहरू समाधानका लागि विभिन्न कूटनीतिक संयन्त्रहरू सक्रिय रहेको उल्लेख गर्दै समस्या वार्ता र आपसी समझदारीमार्फत समाधान हुने विश्वास व्यक्त गरे। साथै, उनले प्रधानमन्त्रीको भनाइलाई गलत रूपमा नबुझ्न र त्यसको सन्दर्भलाई पुनः सुनेर बुझ्न सञ्चारकर्मीहरूलाई आग्रह गरे।
