काठमाडौं – विपक्षी दलहरूले भोटेकोशी बाढीबाट प्रभावित क्षेत्रमा सरकारले अहिलेसम्म गरेका खोज, उद्धार तथा राहतका कामबारे सरकारको ध्यानाकर्षण गराउने निर्णय गरेका छन् ।
प्रमुख प्रतिपक्षी दल नेपाली कांग्रेसले बिहीबार सिंहदरबारमा बोलाएको विपक्षी दलहरूको बैठकले बाढी प्रभावित नागरिकको अवस्था र राहत तथा पुनःस्थापनाका विषयमा संसद्मा आवाज उठाउने निर्णय गरेको हो ।
बैठकपछि निर्णयबारे जानकारी दिँदै नेकपा एमालेकी उपनेता पद्मा अर्यालले भोटेकोशी बाढी प्रभावित क्षेत्रमा भइरहेका खोज, उद्धार र राहतका कामका लागि सरकारलाई धन्यवाद दिइएको बताइन् । यद्यपि, सुरुवातदेखि नै सबै पक्षसँग प्रभावकारी समन्वय हुन नसकेको भन्दै उनले थप क्षति हुनबाट रोक्न सकिने अवस्था रहेको धारणा राखिन् ।
‘भोटेकोशी बाढीको विषयमा सरकारको ध्यानाकर्षण गर्ने, संसद्मा हाम्रो आवाज उठाउने निर्णय भएको छ,’ अर्यालले भनिन्, ‘अहिले जे जति खोज, उद्धार र राहतका काम भइरहेका छन्, भएका कामका निम्ति धन्यवाद छ । सुरुमै सबैसँग समन्वय भएका भए अझ धेरै बाँच्थे होला ।’
उनले बाढी प्रभावित नागरिकको धैर्यको सीमा सकिँदै गएको भन्दै उनीहरूको तत्काल गाँस, बास र कपासको व्यवस्था गर्न सरकारको ध्यानाकर्षण गराउने निर्णय भएको जानकारी दिइन् ।
बैठकले भोटेकोशी बाढी प्रभावित नागरिकको तत्कालीन आवश्यकता सम्बोधनसँगै राहत, पुनःस्थापना तथा पुनर्निर्माणका कामलाई प्रभावकारी बनाउन सरकारमाथि दबाब दिने निष्कर्ष निकालेको छ।
