एजेन्सी,४ चैत्र।
रगत जम्ने समस्या देखिएको भन्दै अक्स्फोर्ड एस्ट्राजिनिकाको निर्माण गरेको कोरोना विरुद्धको खोप प्रयोगमा रोक लगाएका केही युरोपेली मुलुकहरुले खोप पुनः प्रयोग गर्ने नगर्ने सम्बन्धमा थप अध्ययन र स्पष्टिकरणको पर्खाईमा रहेका छन् ।
फ्रान्स, जर्मनी, स्पेन र इटालीले युरोपेली संघको नियामक निकायले गर्ने निर्णयपछि खोपलाई निरन्तरता दिने नदिने निर्णय लिने जनाएका छन् । तर युरोपेली संघको सदस्य रहेका पोल्याण्ड र बेल्जियमले भने अन्यन्त सानो संख्यामा रगत जमेको पाइएको र खोप लगाएकै कारण ती मानिसमा रगत जमेको भन्ने प्रमाणित नभएकाले एस्ट्राजेनिकाको खोपलाई निरन्तरता दिने जनाएका छन् ।
युरोपेली मेडिसिन सम्बन्धी निकाय इएमएले यस विषयमा बिहीबार आफ्नो खोज सार्वजनिक गर्दैछ । तर रगत जम्ने समस्या खोप दिनु अघि पनि सानो संख्यामा सामान्य रहेको इएमएको भनाई छ ।
विश्व स्वास्थ्य संगठनले खोपकै कारण रगत जमेको भन्ने कुराको कुनै प्रमाण नरहेको जनाएको छ । एस्ट्राजिनिकाले दिएको तथ्याङ्क अनुसार युरोपमा खोप लगाएका एक करोड ७० लाख मानिसमध्ये ३७ जनामा रगत जम्ने समस्या देखिएको छ ।।
