चीनसँगको उत्तरी नाका रसुवागढी संचालनमा नल्याउन रसुवाको गोसाइँकुण्ड गाउँपालिका २ नम्बर वडा कार्यालय टिमुरेले जिल्ला प्रशासन कार्यालय रसुवाको ध्यानाकर्षण गराएको छ । सोमबार टिमुरेमा प्रमुख जिल्ला अधिकारी अर्जुन भण्डारीलाई वडाध्यक्ष दावा तामाङले नाका संचालनमा नल्याउन माग गर्दै ध्यानाकर्षण पत्र बुझाएका हुन् ।
सरकारले एकातिर देश लकडाउन गर्ने र अर्कोतिर अन्तराष्ट्रिय नाका रसुवागढी संचालनमा ल्याउने निर्णयले जनतामा आतङ्क सिर्जना गरेको भन्दै वडाध्यक्ष तामाङले आपत्ति जनाए ।
सरकारले कोरोना भाइरस रोकथाम गर्ने तिर भन्दा संक्रमण फैलाउने तर्फ अग्रसर भएको समेत उनले बताए । चीनबाट सुरु भएको कोरोना संक्रमण बिश्यव्यापी रुपमा फैलिएको र रसुवागढी नाका उच्च जोखिममा रहेको भन्दै सरकारले नाका खोल्ने निर्णय फिर्ता लिनुपर्ने समेत उनले बताए ।
कोरोना भाइरसको महामारी नियन्त्रण नहुन्जेल रसुवागढी नाका तथा वडा क्षेत्रमा आवतजावत नगर्न समेत उनले अनुरोध गरेका छन् ।